24tsag.mn хобби булангийнхаа энэ дугаарт ууланд авирах хоббитой улс төрчдийг уншигчдадаа танилцуулж байна.

Ууланд авирах, усанд сэлэх, зураг дарах дуртай ерөнхий сайд Н.Алтанхуяг чөлөө гарвал Монгол нутгаараа аялах хоббитойгоос гадна явсан газрынхаа зургийг дарж гэрэл зургийн фонддоо хадгалдаг. Тэрээр “Хэндий Өндөр Уул” “Алтай таван богд” “Цэцээ гүний оргил”-оос эхлээд Увс, Завхан, Говь-Алтай, Өмнөговь, Хэнтий, Дорнод, Төв аймгийн уул нуруудад гарч байжээ.  “Монголдоо сайхан аялцгаая” нэртэй фото зургийн үзэсгэлэн ч гаргаж байсан удаатай. Тэрээр намын нөхдөө өөрийн хоббиндоо татан оруулж ч чадсан байна.

УИХ-ын гишүүн Ч.Сайханбилэг, С.Баярцогт, С.Бямбацогт, Ж.Батзандан гээд улс төрчдөөс ууланд авирах хоббитой хүн олон. С.Бямбацогт гишүүн гэхэд “Алтай таван богд”, “Мөнх хайрхан”, “Цамба гарав”-ын оргилуудад гарч байснаа сайрхан ярьдаг. Хөдөө мал хариулж өссөн нь түүнийг ууланд авирах хорхойтой болгожээ.  УИХ-ын гишүүн  С.Баярцогтын өрөөнд мөнх цаст уулсын зураг их байдаг. “Би явган аялал, ууланд авирах зэргээс их энерги, эрч хүч авдаг. Цэцээ гүний оргилд 30 минут явж орой дээр нь гараад, цаг  10 минут алхаад  буучихдаг” гэж нэгэн хэвлэлд өгсөн ярилцлагадаа дурджээ. Ууланд авирах нь түүнд аливааг эргэцүүлж бодох боломж, дээрээс нь  цэвэр агаар, биеийн тамираар хичээллэх боломжийг олгодог гэнэ. Ч.Сайханбилэг, С.Баярцогт гишүүнийг Монголчуудын шүтэн биширдэг, төрийн тахилгат Отгонтэнгэр ууланд  нууцаар авирсан гэх дам яриа ч байдаг юм.

Нэгэн цагт  улсын ерөнхийлөгч, ерөнхий сайд явсан Н.Энхбаяр, М.Энхсайхан хоёр хоёулаа ууланд авирах адилхан хоббитой. М.Энхсайхан Алтай таван богдод авирахдаа чулуунд алмасын мөр харсан гэж хэлээд онигоонд орсон гэдэг. Харин Н.Энхбаяр “Ууланд авирах нь өөрөө өөрийгөө ялснаас эхэлдэг юм” гэж үздэг. Тэрээр Ховд, Баян-Өлгийн зааг дээр байдаг Сайр хайрханы орой дээрээс цанаар бууж байжээ.

 Сүүлийн үед ууланд авирах хоббитой улс төрчид УИХ-ын гишүүн Ж.Батзандан, ИЗН-ын ерөнхий нарийн бичгийн дарга Г.Ганхүү нараар хүрээгээ тэлж байгаа. 

Г.Ганхүү дэлхийн зургаа дахь тив болох Антарктидийн ноён оргилд оросын уулчдын хамтаар  амжилттай авирч төрийнхөө далбааг мандуулж байсан нэгэн.  Мөн уулчдын түүхэнд анх удаа уг ноён оргилд авирсан түүний гавьяа уулын спортод бас нэгэн онцлог үйл явдал болж байсан удаатай. МУГТ, уулчин Г.Өсөхбаяр, Б.Гангаамаа гээд олон шилдэг уулчдыг тоочвол урт жагсаалт болох буй за.