Үндэсний их баяр наадмын түүхт 100 жилийн ой хэдхэн хоногийн дараа болно. Хэдийгээр Үндэсний их баяр наадмыг цахимаар явуулахаар болсон ч 1024 бөх барилддагаараа барилдаж, сур харваж, морь уралддагаараа уралдана. Үүнийг дагаад өнөөдөр унаач хүүхдүүдийн амь нас, эрүүл мэндтэй холбоотой асуудал сөхөгдөж эхэллээ. Гэмтэл согог, сэргээн засах үндэсний төвд өдөрт 3-7 хүүхэд мориноос унасан бэртэл, гэмтэлтэй ирдэг байна.

Жилийн жилд л Үндэсний их баяр наадмаар хүүхэд мориноосоо унасан, чирэгдсэн тохиолдол олон арваараа гардаг бөгөөд эрүүл мэнд, амь насаараа хохирох нь элбэг. Харин энэ жилийн хувьд энэ эрсдэлээс гадна унаач хүүхдийн эрүүл мэндийг гаргуунд гаргаж байгаа нь аймшигтай юм.

Уяачдыг вакцины бүрэн тундаа хамрагдахыг шаардаж, тэд ч тодорхой хэмжээгээр дархлаатай болоод байгаа.

Харин унаач хүүхдүүд ямар ч дархлаажуулалтгүй байгаа нь тэд халдвар авах эрсдэл туйлын өндөр гэсэн үг юм. Төрийн томчууд, манлай уяачид нь өөрийнхөө хүүхдийг халдвараас сэргийлж, хэнтэй ч уулзуулахгүй зуслан, хуастаа тусгаарласан хэрнээ айлын хүүхдийг хэдэн зуугаар нь морь унуулж, уралдуулж, түүнийгээ үзэн цэнгэх хэрэг үү. Энэ нь хүүхдийн эсрэг үйлдэж буй гэмт хэрэг бөгөөд үүнийгээ зогсоохыг Төр, засгаас иргэд шаардаж эхлээд буй юм. Ардын хүүхдийн амийг гаргуунд нь гаргаж, өөрийн хүүхдээ бөөцийлөн байж наадамлах арчаагүй сэтгэхүйтэй улс бид гэж үү!

У.Тэргэл