Ерөнхий сайд Л.Оюун-Эрдэнэ, Шадар сайд С.Амарсайхан, Эрүүл мэндийн сайд С.Энхболд нар УОК-ын шуурхай штаб дээр ажиллажээ.

Шадар сайд  С.Амарсайхан: Коронавирусийн халдварын эсрэг авч буй арга хэмжээ, нөхцөл байдлын талаар танилцууллаа. Тэрбээр "Эрүүл мэндийн яам эм, эмнэлгийн байгууллагын ханган нийлүүлэлт, тоног төхөөрөмжийг тасалдуулахгүй байх талаар бүх арга хэмжээг авч ажиллаж байна. хүчилтөрөгчийн бэсрэг үйлдвэрүүдийг эмнэлгүүдэд суурилуулсан. ХӨСҮТ-ийн хүчилтөрөгчийн үйлдвэр хэвийн ажиллаж байгаа. 

Мөн эмнэлзүйн түргэн тусламжийн баг гаргаж ажиллаж байна. мэргэжлийн зөлөн туслах багийг бүрдүүлж байгаа. Гэрээрээ эмчлүүлж байгаа иргэдийн өвчлөлийг бууруулах, нас баралтыг багасгах талаар анхаарч ажиллаж байгаа. Ирэх долоо хоногт ДЭМБ-аас эмнэлгийн тусламж үйлчилгээний баг 40 хоног ажиллана. Вакцинжуулалт орон нутагт дунджаар 69 орчим хувьтай, нийслэлд хоёрдугаар тунд хамрагдсан иргэдийн тоо 84 орчим хувьд хүрсэн. Хоёрдугаар тунд хамрагдаагүй 200 гаруй мянган иргэн бий. Энэ ажлыг эрчимжүүлэх ажил хийгдэж байна. 150 мянга гаруй 12-17 насны хүүхэд вакцинд хамрагдаад байна. Мөн 4800 орчим жирэмсэн эх вакцинд хамрагдсан. Вакцины үр нөлөө сайн байгаа нь судалгаагаар батлагдаж байна. Тиймээс энэ ажлыг эрчимжүүлэхэд анхаарч байгаа. Долоодугаар сард 30 нислэг 4800 гаруй иргэнээ татан авахаар төлөвлөсөний 1400 иргэнээ татан аваад байна. 650 гаруй иргэн тусгаарлах байранд тусгаарлагдаж байна. 

Аймаг, орон нутаг руу зорих иргэдийн тоо сүүлийн хоёр хоногт эрчимтэй нэмэгдсэн. Тухайлбал долоодугаар сарын аравны өдөр 7800 орчим автомашин, есны өдөр 9000 гаруй автомашин товчоодоор орж гарсан. Нийт 30-аад мянган иргэн нийслэлээс орж, гарсан байна. Халдвар хамгааллын дэглэм баримтлах үүднээс орон нутгийн удирдлагууд зохих арга хэмжээг авч ажиллаж байгаа. Өнөөдрийн байдлаар долоон аймгийн 60 сум хөл хорио тогтоосон байгаа. Баяр наадмын өдрүүдэд иргэд орон нутгийг ихээр зорчиж, халдвар хамгааллын дэглэм алдагдаж, нууц үеийн дараа халдвар ихээр нэмэгдэх эрсдэл өндөр байгаа.  

Ерөнхий сайд Л.Оюун-Эрдэнэ: Эмнэлгүүдэд орны хүрэлцээ ямар байна вэ. Хөдөө орон нутаг руу явах хөдөлгөөнийг хянахгүй бол хотод тохиолдлын тоо буурч, орон нутагт нэмэгдэх вий. Одон медалийн дараа халдварын тоо нэмэгдсэн шиг зүйл болох вий. Түүнийгээ тооцож ажиллаарай. Хэрэв хөдөө орон нутагт хүндрэл гарвал хэрхэн ажиллах төлөвлөгөөг гаргасан биз дээ. Энэ хүнд үед ажилласан хүмүүсээ хуваарь гаргаад дараа нь амраах хэрэгтэй шүү. 

Эрүүл мэндийн сайд С.Энхболд: Өнөөдрийн байдлаар Улаанбаатарт 5600 орчим ор бэлтгэгдсэн байсан. Орны эргэлт сайжирч, эмнэлэгт хэвтэн эмчлүүлж байгаа иргэдийн тоо буурч байгаа. 

УОК-ын нарийн бичгийн дарга Т.Баярхүү: Одоогоор орон нутагт халдвар авсан иргэдийн хувьд хүндрэл бага байна. Өнөөдрийн байдлаар Орхон болон Дундговь аймгийн Дэлгэрцогт суманд нэг, нэг хүн нас барсан гэх мэдээлэл бий. Нэг нь жирэмсэн эмэгтэй байсан. Шуурхай штаб болон цагдаа, онцгой байдлын байгууллагаас гурван ээлжээр 180 гаруй алба хаагч ажиллаж байна.

Б.Баатар