Засгийн газрын ээлжит бус хуралдаанаар авлигын эсрэг Ажлын хэсгийг 15 хүний бүрэлдэхүүнтэйгээр байгуулсан. Улмаар олон улсын гаргадаг авлигын төсөөллийн индексийн үзүүлэлтийг хоёр оронтой тоонд оруулах томоохон зорилт дэвшүүлээд байна. Тухайлбал, авлигын индексээр 180 улсаас манай улс 111 дүгээрт ордог. Тиймээс хоёр жилийн хугацаанд энэ тоог 100-д хүргэх чухал үүргийг Хууль зүй, дотоод хэргийн сайд Х.Нямбаатар хүлээгээд байна.

Ингэхэд авлига, албан тушаалын хэрэгтэй тэмцэх, мөрдөх, урьдчилан сэргийлэх тусгай нэгж, хэлтэстэй бүхэл бүтэн Авлигатай тэмцэх газар гэж байхад Засгийн газрын дэргэд түүнээс ч илүү эрх мэдэлтэй, салбар салбарын төлөөлөл багтсан ажлын хэсгийг хоёр жил ажиллуулснаар ямар үр дүнд хүрэх вэ. Эргэлзээтэй л асуудал. Хамгийн гол нь авлигын эсрэг эрхзүйн орчныг сайжруулна гэдгийг Ерөнхий сайд онцолсон. Тэгэхээр АТГ-т ийм эрхзүйн орчин дутагдаад байна гэсэн үг үү. Энэ талаар хуульчид төрөл бүрийн байр суурь илэрхийлж байна.

Ажлын хэсгийн 15 хүнийг цалинжуулна, тодорхой төсөв баталж өгнө мөн л хөрөнгө мөнгө үргүй зарсан явдал болно хэмээж байгаа бол Засгийн газрын дэргэдэх гэдэг утгаараа арай дээгүүрт “загнаж”, хаа сайгүй илэрч байгаа оффшор данс, нууц, далд авлигыг ил гаргахад харин ч тустай гэцгээж байна.

Мөн шүгэл үлээгчдийг хамгаалах, олноор бий болгосноор авлигатай тэмцэх алхамд эрч нэмж болох л юм. Тодруулбал, Авлигын эсрэг ажлын хэсгийг байгуулснаар Эрүүгийн тухай хууль болон Авлигын эсрэг хуульд нэмэлт өөрчлөлт оруулна.

Шүгэл үлээгчдийн тухай хуулийн төслийг эцэслэн боловруулж, УИХ-д өргөн мэдүүлнэ хэмээж буй. Өмнө нь "шүгэл үлээгч"-ийг "нууц мэдээлэгч", "матаач" гэсэн утгаар нь хардаг байсан бол өдгөө "Шүгэл үлээгч" гэдэг болж, байгууллагын дотоодод болж байгаа зүй бус үйлдлээс гадна улс орны хэмжээнд, дэлхий нийтийн түвшинд болж байгаа зүй бус үйлдэл, тухайлбал, нийтийн эрх ашигт шууд харшилсан, хууль, дүрэм зөрчсөн, авлига, луйвар зэргийг баримт нотолгоотойгоор нийтэд дэлгэхийг ойлгодог.

Мөн авлигыг илчилж, энэ тухай өргөдөл, гомдол гаргах, мэдээлэл өгөх, тайлан гаргах, тайлбар өгөх зэрэг нийтийн ашиг сонирхлын төлөөх үйлдлийг шүгэл үлээгчид хэмээдэг байна.

Харин үүний хэм хэмжээг нарийн тогтоож өгөхгүй бол нэг нэгнээ чадах гэж худал мэдээлэл, гомдол өгдөг, матдаг явдал гаарч, бусдын нэр төрд халдах явдал ихэснэ. Энэ нь эсрэгээрээ матаачдыг олноор төрүүлэх уршигтай гэдгийг ч хуульчид анхааруулж байна.

У.Тэргэл