Төрийн эрх барих дээд байгууллагаасаа эхлээд ард иргэдийн эрх ашгийг хамгаалах учиртай байгууллага нь хүртэл сошиалын давалгаагаар ажиллаад хэдийнэ дасал болжээ. Нэг үгээр хэлбэл цахим сүлжээнд хэн хэл ам хийж, олны анхааралд өртөнө тэнд төрийн байгууллага ажиллаж, асуудлыг түргэн шуурхай шийддэг тогтолцоо бий болов. Хамгийн сүүлийн жишээ нь Хавдар судлалын үндэсний төв болон Дөрөвдүгээр эмнэлгийн хооронд үүссэн газрын маргааны асуудал. 

Олны анхаарлаас хол байсан газрын маргааныг Дөрөвдүгээр эмнэлгийнхэн цахим сүлжээнд "сэвж", төрийн байгууллагыг хөдөлгөж дөнгөв.

Тус эмнэлгийнхэн сошиалаар "ХСҮТ-ийнхэн өвчтэй хүмүүсийн эрх ашгийг зөрчиж, хаалт босгож байна, шударга өрсөлдье" хэмээн "сэвсэн" нь ШӨХТГ-ын дарга Б.Бат-Эрдэнэ болон Баянзүрх дүүргийн Засаг дарга Н.Баярмөнх нарыг хөдлөхөд хүргэсэн. Тэд өчигдөр тус газарт ажиллаж, холбогдох албаныхантай уулзсан ч олны өмнө "мад тавиулав".

Тодотговол,  ШӨХТГ-ын дарга Б.Бат-Эрдэнэ "Монгол Улсад эмнэлэг ховор, өвчтэй хүмүүс урт дараалалд дугаарлаж байна. Ялангуяа Сонгинохайрхан, Баянзүрх дүүрэг нийслэлийн хамгийн их хүн амтай дүүргүүд. Ийм байхад хоёр эмнэлгийн хооронд зорчих иргэдийн хөдөлгөөнийг хорьж болохгүй. Энэ асуудлыг л бид ярьж байна. Өрсөлдөөнийг хязгаарлаж болохгүй" гэдгийг онцлоход ХСҮТ-ийн дэд захирал Л.Баярсайхан "Өнөөдөр асар их дарамт мэдэрлээ. ШӨХТГ-аас үг хэлээр дооглон, инээж байгаа нь эвгүй сэтгэл төрүүллээ. Бид бүгд үүнд бухимдаж байна. Төрийн байгууллага ингэж ажилладаг юм уу. Бидэнд янз янзын шаардлага тавих юм.

Бид улсын эмнэлэг. Хэнтэй өрсөлдөх гэж байгааг ойлгосонгүй. Бид хэнтэй ч өрсөлдөх гээгүй. Зөвхөн үйлчилгээ явуулах талбайгаа цэгц, журамтай байлгамаар байна. Хувийн эмнэлэг бол хогоо өөрсдөө хая, машин битгий оруул гэсэн нөхцөлтэй.

Улсын эмнэлэгт ажиллаж байгаа хүмүүс энэ байр суурьнаас асуудалд хандсан. Гэтэл бямба, ням гаригт ерөнхий захирал руу утсаар ярьж дарамталсан байна. Хоёрт, манай ХСҮТ-өөс Дөрөвдүгээр эмнэлэг рүү албан тоот явуулан хамтарч ажиллая, ярилцья гэхэд хариу ирүүлээгүй. Тэгсэн хэрнээ сошиалаар ХСҮТ-ийнхэн өвчтэй хүмүүсийн эрх ашгийг, зөрчлөө хаалт босгож байна, шударга өрсөлдье гэж ярьж эхэлсэн. ХСҮТ-тэй энэ эмнэлэг өнөөдөр өрсөлдөх юм байна л даа. Юугаараа ч өрсөлдөх юм. Өрсөлдөгч болсноо өнөөдөр л мэдлээ” хэмээсэн юм. 

Үнэндээ монголдоо ганц хавдарын улсын эмнэлэг нь шинээр баригдаж буй хувийн эмнэлэгтэй өрсөлдөгч болно гэж юу байхав. Үүнийг ШӨХТГ-ын дарга Б.Бат-Эрдэнэ тунгаасангүй юу, эсвэл сошиалын давалгаанд хөтлөгдөн асуудалд ул суурьтай хандсангүй юу, ямартай ч хэвлэл мэдээллийнхэнг дагуулж очсон түүний попрол талаар болж, өөрөө эвгүй байдалд ороод буцсан. 

Түүнчлэн эл асуудалд анхаарал хандуулж буй гэх Баянзүрх дүүргийн Засаг дарга Н.Баярмөнх ч олон нийтэд таатай харагдаагүй. Тэрбээр энэ үеэр "Хоёул эмнэлэг учраас маргаан хүндэрч, асуудал шийдэгдэхгүй тохиолдолд иргэд л эрүүл мэндээрээ хохирч үлдэнэ гэдгийг ойлгох хэрэгтэй. Тиймээс дүүргийн Засаг даргын хувьд эмнэлгүүдийн дунд үүсээд байгаа асуудлыг хэн нэгний эрх ашиг, ямбаны төлөө биш зөвхөн иргэдийн эрх ашгийн төлөө өөр хоорондоо харилцан ярилцаж, аливааг эв зүйгээр шийдэх ёстой гэсэн байр суурьтай байна" гэдгээ илэрхийлсэн.

Тэрбээр эмнэлгүүдийн хооронд газрын маргаан үүсч байгааг хамгийн түрүүнд мэдэх учиртай. Гэтэл асуудал хурцдаж, олны анхааралд өртсөн хойно ийнхүү ярьж байгаа нь мөн л зохисгүй харагдана лээ. 

Б.Баатар