Зуны 16 дахь удаагийн паралимпын наадам энэ сарын 24-ний өдөр Токио хотноо нээлтээ хийсэн. Энэ удаагийн наадамд Монголын 11 тамирчин спортын зургаан төрөлд өрсөлдөж буй.

Гэтэл энэ удаагийн паралимпын наадмыг манай улсын нэг ч телевиз шууд дамжуулсангүй. Эх сурвалжийн мэдээлж буйгаар телевизүүдийн холбоо шууд дамжуулах эрхийг нь авч дөнгөөгүй аж. Шуудхан хэлэхэд төр засаг нь тэднийг тоогоогүй учир ийм байдал хүрэв бололтой. Үнэхээр харамсалтай, халаглам үйлдэл боллоо.

Угтаа үүнд хамгийн их анхаарал хандуулах учир төрийн байгууллага нь Хөдөлмөр нийгмийн хамгааллын яам. Гэтэл салбарын сайд А.Ариунзаяа нь хөгжлийн бэрхшээлтэй иргэдээ ийнхүү ялгаварлан гадуурхаж, тэднийг ойлгож, хайрлах ганц боломжийг тоосонгүй, хөсөр хаясан нь олныг дургүйцлийг төрүүлэв.

Тиймээс ч энэ үйлдэлдээ уучлалт гуйх ёстой хэмээн олон нийт үзэж байна. Гэтэл үүнд А.Ариунзаяа сайд нүдэн балай чихэн дүлий суусаар л. 

Гэтэл Япон улс паралимпын наадмыг сургуулийн насны хүүхдүүдэд үзүүлэх шийдвэр гаргаж, паралимпын эхний өдөр 1000 хүүхэд тэмцээн явагдаж байгаа таван газарт ширээний тeннис, гоолбол зэрэг тэмцээн үзсэн талаар мэдээлж байна.

Б.Туяа: Ах маань монголоо төлөөлж хоёр ч удаа олимпод оролцсон. Гэтэл нэг ч удаа телевизээр уралдаж байхыг нь харж байгаагүй

Паралимпын наадмыг, тэр дундаа хөгжлийн бэрхшээлтэй иргэдийг ялгаварлан гадуурхах явдал их байдаг, энэ нь энгийн үзэгдэл болсон талаар ч иргэд цахим сүлжээнд байр сууриа илэрхийлсээр байна. Тухайлбал, иргэн Б.Туяа "Ах маань пара цанын тамирчин монголоо төлөөлж хоёр ч удаа олимпод оролцсон гэтэл нэг ч удаа телевизээр уралдаж байхыг харж байгаагүй гэтэл эрүүл бол дамжуулаад л байдаг Хөгжлийн бэрхшээлтэй хүн эрүүл хүнийг бодвол 2 дахин их бэлтгэл  2 дахин хүч хөдөлмөр зарцуулдаг юм шиг л санагддаг. Гэтэл ах маань гэртээ хүртэл тав тухтай байхгүй байсаар байгаад л дараагийн олимпод оролцдог. Харин эрүүл тамирчин B зэрэглэлээс A зэрэглэл рүү ороход л байр өгөөд л маш олон телевиз гаргаад л байдаг. Барьцаж байгаа хэлбэр бол биш. Зүгээр л тэгш эрхийг л хүссэн ах маань тийм муу тамирчин ч биш. Азидаа бол өөрийн төрөлдөө зэрэглэл өндөртэй олон улсын тэмцээнээс 2 ч удаа медаль авч байсан. Одоо 2022 оны өвлийн олимпод дахиад оролцоно гэтэл бас л бид үзэж ч чадахгүй учир нь зүгээр л мэдээний хэдхэн секундын тоймоор л харна. Энэ бол нийгмийн гадуурхал мөнөөсөө мөн" хэмээжээ.

Б.Болороо: Паралимпыг шууд дамжуулсан бол олон бяцхан үрс хүний ялгаатай байдлыг хүлээн зөвшөөрч, ойлгодог болох байлаа

Хөдөлмөр нийгмийн хамгааллын яамны Хүн амын хөгжлийн газрын мэргэжилтэн, хөгжлийн бэрхшээлтэй иргэдийн дуу хоолой болсон Б.Болороо ч энэ талаар байр сууриа илэрхийлжээ. Тэрбээр “Паралимпыг шууд дамжуулсан бол олон бяцхан үрс хүний ялгаатай байдлыг хүлээн зөвшөөрч, ойлгодог болох байлаа.

Би охиндоо одоо ээж шиг нь хөгжлийн бэрхшээлтэй хүмүүсийн оролцдог спортын тэмцээн олон хоног гарна миний охин үзээрэй гэж хэлж байсныг нь яана гээч.

Хүн болгон хоёр гартай, хоёр хөлтэй, явдаг хардаг байдаггүй гэж байнга хэлдэг юм. Тэгсэн охин ээжээ таны үзээд байдаг сагсыг Яаж хөлгүй хүн тоглох вэ хоёр гаргүй хүн ч гэсэн чадахгүй биздээ гэж байлаа. Тэгэхээр нь би миний охин зурагтаар гарахаар нь үзээрэй, хүн болгон гутал өмсөж явдаггүй юмаа гэж хэлж байлаадаа” хэмээсэн байна. 

Б.Баатар