Олны анхаарлыг тэр бүр татаад байдаггүй байсан ХӨСҮТ коронавирусний цар тахлаас хойш "од" болсон. Нэг үгээр хэлбэл халдварт өвчин дэгдсэн нь эрүүл мэндийн салбар тэр дундаа ХӨСҮТ-ийг олны анхааралд эрхгүй оруулсан билээ. Тиймээс ч тус байгууллагын дотоод, гадаад орчин, тоног төхөөрөмжийн чанар, стандарт, үйлчилгээ, эмч нарын ур чадвар, байгууллагын удирдлагууд гээд бүхий талаараа анхаарал татсан сэдэв байсаар ирлээ. 

2007 оноос хойш байгууллагын захирал нь солигдоогүй ХӨСҮТ-ийн удирдлага сүүлийн есөн сарын хугацаанд хэдэнтэй өөрчлөгдөж, төрийн албанд халгаа сэлгээ хэрхэн явагддагийг утгаар нь харууллаа. Тодотговол,   

2020 оны нэгдүгээр сарын 21: Эрүүл мэндийн сайд Т.Мөнхсайхан тушаал гаргаж, ХӨСҮТ-ийн Ерөнхий захирал Д.Нямхүүг үүрэгт ажлаас нь чөлөөлсөн. Түүнийг ажлаас чөлөөлөх шалтгаан нь нэгдүгээр сарын 19-ний орой "Өргөө" амаржих газарт төрсөн эхийг орой нь ХӨСҮТ рүү шилжүүлэхдээ хүнлэг бус загнасан, өвчтөн тээвэрлэх журмыг зөрчсөн, ажилдаа хариуцлагагүй хандсан гэх үндэслэлээр ажлаас нь чөлөөлсөн байдаг. Харин Д.Нямхүү захирал энэхүү шийдвэрийг эсэргүүцэн шүүхэд хандсан бөгөөд анхан шатны шүүхийн шийдвэр түүний талд гараад байгаа.  

2021 оны нэгдүгээр сарын 27: Эрүүл мэндийн сайд Т.Мөнхсайхан ХӨСҮТ-ийн дэд захирлаар ажиллаж байсан Д.Наранзул ерөнхий захирлаар томилов. Тэрбээр ХӨСҮТ-ийн дэд захирлаар томилогдохоос өмнө Сүрьеэгийн тандалт судалгааны албаны судлаачаар ажиллаж байсан нэгэн юм. Түүнийг өөрийн хүсэлтээрээ ажлаас чөлөөлөгдсөн хэмээдэг ч угтаа үүнд улс төрийн эрх ашиг байсан гэдгийг тэрбээр нуугаагүй. Тодруулбал, Шадар сайд С.Амарсайхан ХӨСҮТ-ийн үйл ажиллагаатай танилцах үеэр ХӨСҮТ-ийн захирал Д.Наранзул “Та нар өнгөрсөн хугацаанд улс төржсөөр байгаад энэ эмнэлгийг ийм байдалд хүргэсэн. Та нар намайг сольж өөрсдийн хүнээ тавих гээд байгаа бол болно. Би энэ эмнэлгийн даргаар ажиллахгүй” хэмээж байсан гэдэг. Улмаар түүнийг 2021 оны гуравдугаар сарын 19-ны өдөр үүрэгт ажлаас нь чөлөөлсөн юм. 

2021 оны оны гуравдугаар сарын 19: Эрүүл мэндийн сайд С.Энхболд Д.Наранзулыг үүрэгт ажлаас нь чөлөөлж, ХӨСҮТ-ийн захирлаар Л.Баттөрийг томилов. Тэрбээр Төрийн тусгай албаны эмнэлгийн захирлаар 2016-2020 он, улмаар АШУҮИС-ийн эмнэлэг хариуцсан дэд захирлаар ажиллаж байгаад тус албанд томилогдсон байдаг. Тэгвэл есдүгээр сарын 6-ны өдөр түүнийг үүрэгт ажлаас нь чөлөөлөв. Мөн л түүнийг өөрийн хүсэлтээрээ ажлаасаа чөлөөлөгдсөн гэх. 

2021 оны есдүгээр сарын 7: Эрүүл мэндийн сайд С.Энхболд ХӨСҮТ-ийн захирал Л.Баттөрийг үүрэгт ажлаас нь чөлөөлж, түүний оронд Улсын хоёрдугаар төв эмнэлгийн дэд захирал Ц.Билэгтсайханыг томилжээ. Ц.Билэгтсайхан нь 2014 оноос өнөөдрийг хүртэл Хоёрдугаар төв эмнэлгийн дэд захирлаар ажиллаж байсан нэгэн аж.

ХӨСҮТ-ийн ерөнхий захирлын томилгоо ийнхүү явагджээ. Хатуухан хэлэхэд, ХӨСҮТ-ийн захирлын албан тушаал тоглоомны томилгоо болсон бололтой. 

Харин ямар учраас тус байгууллагын удирдлагыг ойр ойрхон өөрчлөөд байдаг нь олны анхаарлыг эрхгүй татаж байна. Коронавирусний цар тахалтай холбоотойгоор ХӨСҮТ-д их хэмжээний мөнгө эргэлдэж, холбогдох албан тушаалтнууд нь завшсан байх магадлалтай хэмээн нэр бүхий хүмүүсийг АТГ саатуулан шалгаж буй. Энэ нь ч ерөнхий захирлын албан тушаалтай холбоотой байхыг үгүйсгэхгүй. Тиймээс ч ийнхүү халгаа сэлгээг хийж буй гэдгийг хэлэх хүн цөөнгүй. 

Түүнчлэн цар тахлаас үүдэж, эдийн засаг хямарч буй энэ үед зөвхөн ХӨСҮТ-д л мөнгө угаах ганц боломж байгаа учир улстөрчид ийнхүү овшин ашиглаж удирдлагуудыг нь хольж сольж байна гэх. 

Коронавирусний халдвар хэдийнэ цар тахлын хэмжээнд хүрч, хичээл сургуулийн үйл ажиллагааг ч доголдож мэдэхээр болоод буй энэ үед цар тахалтай утгаар нь тэмцэж, хяналтандаа оруулах гол чих үүрэгтэй ХӨСҮТ-д сандал суудлын халаа сэлгээ хийгдэхээс бус өөр дорвитой арга хэмжээ авахгүй байгаа нь олны нүдээ ил байна.  

Б.Баатар