МАН-ын Их хурал энэ долоо хоногийн Монголын улс төрийн анхаарах сэдэв байлаа. УИХ-ын хоёр, орон нутгийн хоёр, нөхөн хоёр, Ерөнхийлөгчийн нэг сонгуульд дараалан үнэмлэхүй ялалт байгуулаад байгаа МАН Монгол Улсын ойрын ирээдүйг хэрхэн зурж байгааг Их хурлынх нь илтгэлүүдээс харж болохоор байв. Ерөнхий сайд Л.Оюун-Эрдэнэ “Зууныг эхлүүлэх зургаан сэргэлт буюу Шинэ сэргэлтийн бодлого”-оо танилцуулж, УИХ-ын дарга Г.Занданшатар “Парламентат ёсыг төгөлдөршүүлэх” тухай илтгэл тавьж, МАН-ын генсек Д.Амарбаясгалан ирэх жилүүүдэд МАН хэрхэн хөгжиж, тэр хэрээрээ Монголын улс төрийг тунгалагшуулах талаар улс төрийн илтгэлдээ дурдсан. Эдгээр илтгэлүүдийг бүгдийг нь бүрэн эхээр нь болон онцлох эшлэлүүдээр манай сайт уншигчдадаа хүргэсэн. Харин энэ удаа Ардын намын дарга нар өөр өөрийн хашиж байгаа албан тушаалынхаа хүрээнд ардчиллыг хэрхэн тодорхойлсныг хүргэе.

МАН-ын дарга, Монгол Улсын Ерөнхий сайд Л.Оюун-Эрдэнэ: Ардчилсан хувьсгал бол Монголын ард түмний хамтын хүсэл, бас зориг байсан юм. Ардчилал бол ард түмний засаглал. Ардчилал бол хувь хүн биш, хууль засагладаг нийгэм. Ардчилал бол эрх чөлөө, үүрэг хариуцлагын нийлбэр. Ардчилал бол иргэн бүрийн идэвхтэй оролцоо юм. Ардчилал бол амьдралыг тэтгэгч амьсгалах агаар мэт анзаарагддаггүй ч алдрах цагтаа эрүү нийгмийн аминд хүрэх Та бидний нүдний цөцгий мэт хайрлан хамгаалах ёстой үнэт зүйл юм.

УИХ-ын дарга, МАН-ын Удирдах зөвлөлийн гишүүн Г.Занданшатар: Парламент бол ард түмний хүсэл зоригийг илэрхийлдэг ардчиллын төв байгууллага юм. Ард түмний засаглах эрхийг хангасан парламентын ардчиллыг төгөлдөршүүлэх хэрэгтэй. Парламентын ардчиллын амин сүнс нь ард түмний нийтлэг хүсэл эрмэлзлийг мэдэрч нэгтгэн ойлгож, түүнийгээ шинжлэх ухааны үндэслэлтэй судлан тооцоолоод амьдралд бодлого болон хэрэгжүүлэх, түүнийхээ хэрэгжилтийг хянан шалгаж, шахаж шаардахад оршдог.

МАН-ын Удирдах зөвлөлийн дарга, Ерөнхий нарийн бичгийн дарга Д.Амарбаясгалан: Ардчилал бол иргэн хүний сонгох, сонгогдох болон үзэл бодлоо чөлөөтэй илэрхийлэх, эвлэлдэн нэгдэх эрхийг олгоход чиглэдэг. Улс төрийн намын гишүүн ч мөн адил намын дотоод асуудалд байр сууриа илэрхийлэх, өөрийгөө төлөөлөх чадвартай хүнийг сонгох, асуудлыг хамтран шийдвэрлэх эрхтэй. Улс төрийн намын бүтэц, зохион байгуулалт, үйл ажиллагаа нь гишүүн төвтэй, дотоод ардчиллыг хангасан байх учиртай.

О.Балдан-Очир