МАХН-ын дарга Н.Энхбаяр Нэгдсэн хоёрдугаар эмнэлэгт хэвтэж байгаа билээ. Түүнтэй МАН-ын ерөнхий нарийн бичгийн дарга Г.Занданшатар уулзах хүсэлт гаргасан гэх мэдээлэл гарч байсан. Тэгвэл Г.Занданшатар биш харин МАН-ын дарга Ө.Энхтүвшин Н.Энхбаяртай очиж уулзжээ. Тэрбээр багагүй хөөцөлдөж арваад хоногийн өмнө эргэж очсон байна. Ө.Энхтүвшин энэ талаар "Бид хамтдаа маш их зүйлийг туулсан хоёр шүү дээ. Бидний дунд итгэл, үл итгэл, тэгээд дахин итгэл ч байлаа. Хүмүүсийн явуулгаар хоорондын харилцаанд ан цав үүсэж, түр тар гэх үе байсан ч намаа гээд хамтарч ажиллаад явж л байж. Өнөөдөр тэр хүн ялтан болчихлоо. Хурал нь мэтгэлцээнгүй, хэрэг нь хохирогчгүй, нэхэмжлэгчгүй, хангалттай үндэслэл, нотолгоогүй сонин шүүх ажиллагаа болж өнгөрлөө гээд хүмүүс шуугиад байна. Энэ талаар шүүх олон түмэнд маш тодорхой хариулт өгөөсэй гэж бодох юм. Хүнийг ямар нэг хэлбэрээр хэлмэгдүүлэх вий гэдгээс Монголын төр, улс төрийн хүчнүүд үргэлж сэрэмжлэх ёстой" гэж ярьжээ. Хоёр намын дарга уузахдаа Н.Энхбаярын биеийн байдлаас өөр зүйл ярьж амжаагүй гэв.

 Н.Энхбаяр түүнийг МАН-ын дарга болох үед баяр хүргэн утасдаж байжээ. Ийнхүү МАН, МАХН-ын хоёр дарга үл итгэлцэж байснаа больж, дахин ойр дотно байх болжээ.