Элстэйд халимаг маягийн эрийн гурван наадам буюу “Жангариада” баяр 11 дэх удаагаа болж өнгөрлөө. Энэ удаагийн наадам 1812 оны дайнд Орос орон Францыг ялсны 200 жилийн ойд зориулагджээ. Халимагийн аймаг, сумдыг төлөөлсөн хэд хэдэн гэр бүхий хот айлуудыг Элстэйн төвд барьжээ.200 жилийн өмнөх буюу XIX зууны эхэн үеийн аж амьдралыг харуулсан байдлаар зохиомжилсон хот айл бүрт Халимагийн тэргүүн Алексей Орлов зочилсон байна. “Жангариада” наадмын үеэр мөн үндэсний бөх барилдаж, сур харван, жад шидэж, хурдан морьд 16 километрийн зайд тойруулгад уралджээ. Нум сумын төрөлд Бага Дөрвөд районы Мэргэн Амыков нэрээ баталж хамгийн мэргэн нь байжээ. Хурдан морины уралдаанд 26 хүлэг шандсаа сорьж, Кетченеры болон Чилгир районы морьд түрүүлэн “ВАЗ-2107” автомашинаар эздээ мялаалгасан байна.