Нийслэлийн Иргэдийн Төлөөлөгчдийн Хурлын Тэргүүлэгчдийн 2009 оны
12 дугаар сарын 02-ны өдрийн 161 дүгээр тогтоолын нэгдүгээр хавсралт

Нэг. Нийтлэг үндэслэл

1.1.    “Нийслэлийн эрх зүйн байдлын тухай” хуулийн 21 дүгээр зүйлийн 2 дахь хэсгийг үндэслэн “Нийслэлийн шилдэг аж ахуйн нэгж” /цаашид “шилдэг аж ахуйн нэгж” гэх/-ийг шалгаруулахад энэхүү журмыг мөрдөнө.
1.2.    Энэхүү журмын зорилго нь аж ахуйн нэгжүүдийн нийгэм, эдийн засгийн хөгжил болон байгаль орчинд үзүүлж буй эерэг үйл ажиллагааг хөхүүлэн дэмжих, хэрэглэгчдэд сонголт хийх боломж олгох, аж ахуйн нэгж өрсөлдөх чадвараа дээшлүүлэх, гадаад дотоодын зах зээлд өөрсдийгөө сурталчлан таниулахад дэмжлэг үзүүлэхэд оршино.

1.3.    Шилдэг аж ахуйн нэгжийн шалгаруулалтад Улаанбаатар хотын нутаг дэвсгэрт үйлдвэрлэл, үйлчилгээний чиглэлээр үйл ажиллагаа явуулж байгаа өмчийн бүх хэлбэрийн аж ахуйн нэгж хамрагдах боломжтой.
1.4.    Нийслэлийн Засаг даргын захирамжаар томилогдсон Ажлын хэсэг шалгаруулалтад оролцохыг хүссэн аж ахуйн нэгж, байгууллагын хүсэлтийг хүлээн авч, шалгаруулах ажлыг зохион байгуулах ба дүнг Нийслэлийн Иргэдийн Төлөөлөгчдийн Хурлын Тэргүүлэгчдэд танилцуулж, шийдвэр гаргуулна.
1.5.    Шилдэг аж ахуйн нэгжид Нийслэлийн Иргэдийн Төлөөлөгчдийн Хурлын дарга болон Нийслэлийн Засаг дарга бөгөөд Улаанбаатар хотын Захирагчийн батламжилсан гэрчилгээ,  шилдэг аж ахуйн нэгжийн логог хэрэглэх эрх олгож,  нийслэлийн шилдэг аж ахуйн нэгжийн цом дурсгана.
1.6.    Жил бүр болзол хангасан 5 хүртэлх аж ахуйн нэгжийг “Шилдэг аж ахуйн нэгж”-ээр шалгаруулна.
1.7.    Шилдэг аж ахуйн нэгжийг шалгаруулах болон урамшуулахад шаардагдах хөрөнгийг нийслэлийн төсөвт  жил бүр тусган санхүүжүүлнэ.
1.8.    Мансууруулах болон сэтгэцэд нөлөөлөх бүтээгдэхүүн үйлдвэрлэх чиглэлээр үйл ажиллагаа явуулдаг аж ахуйн нэгжийг шалгаруулалтанд оролцуулахгүй.
1.9.  Хэрэглэгчдийн эрх ашгийг ямар нэг байдлаар хөндсөн, чанаргүй бүтээгдэхүүн, үйлчилгээгээр хэрэглэгчдийг хохироосон нь холбогдох хууль, хяналтын байгууллага, хэрэглэгчдийн эрх ашгийг хамгаалах олон нийтийн байгууллагаар тогтоогдвол Нийслэлийн Иргэдийн Төлөөлөгчдийн Хурлын Тэргүүлэгчийн тогтоолоор шилдэг аж ахуйн нэгжийн логог хэрэглэх эрхийг  цуцална.

Хоёр. Шалгаруулах үзүүлэлт
2.1  Үйлдвэрлэл, үйлчилгээ нь тогтворжиж сүүлийн 5 жил тасралтгүй үйл ажиллагаа явуулж байгаа, төлсөн татварын хэмжээ жил дараалан нэмэгдсэн, татвар болон нийгмийн даатгалын зөрчилгүй байх.
2.2.  Олон улсын удирдлагын тогтолцооны  стандарт /ISO-9001, ISO-14000, HACCP, GMP гэх мэт /-ыг нэвтрүүлэх талаар дэвшил гаргасан байх.
2.3.  Шинэ үйлчилгээ, техник технологи, инноваци нэвтрүүлж, олон улсын болон үндэсний хэмжээний шагнал авсан байх.
2.4.  Улаанбаатар хотын бүтээн байгуулалт, тохижилтод дорвитой хувь нэмэр  оруулж, хотын ерөнхий төлөвлөгөө болон орчны хэсэгчилсэн төлөвлөгөөний зураг төслийн дагуу байгууллага орчноо үлгэр жишээ тохижуулжсан байх.
2.5.  Нийгмийн хариуцлагыг өндөржүүлэх, ажлын байрны тоог нэмэгдүүлэх талаар үр дүнтэй арга хэмжээ хэрэгжүүлж, нийслэлийн иргэдийн аж амьдралыг дээшлүүлэхэд бодит хувь нэмэр оруулсан байх.
2.6.   Аж ахуйн нэгжийн үйл ажиллагаа, бүтээгдэхүүн, ажил үйлчилгээндээ хэрэглэгчдийг дээдлэх зарчмыг нэвтрүүлж, олон нийтийн таашаалыг хүлээсэн байх.
2.7.   Ажиллагчдын тогтвортой хөдөлмөр эрхлэх нөхцөл боломжийг хангаж, хууль,  тогтоомжийн дагуу үзүүлэх нийгмийн халамжаас гадна гурваас доошгүй нэмэлт халамжийн хэлбэрийг хэрэгжүүлсэн байх.
2.8.   Сахилга, дэг журам бэхжүүлэх талаар нийслэлээс дэвшүүлсэн зорилтыг хэрэгжүүлж, хуулийн хүрээнд үйл ажиллагаа явуулдаг байх.

Гурав. Бүрдүүлж ирүүлэх бичиг баримт
3.1.    Шалгаруулалтад орохыг хүссэн аж ахуйн нэгж, байгууллагын албан хүсэлт,
3.2.    Дүүргийн  Засаг  даргын Тамгын газрын тодорхойлолт,
3.3.    Татвар болон нийгмийн даатгалын байгууллагын тодорхойлолт,
3.4.    Аж ахуйн нэгж, байгууллагын танилцуулга, илтгэх хуудас.

Дөрөв. Урамшуулал, дэмжлэг
4.1.  Шилдэг аж ахуйн нэгж нь өөрийн байгууллага, бүтээгдэхүүн, үйлчилгээний  сурталчилгаандаа  “Нийслэлийн шилдэг аж ахуйн нэгжийн лого”-г хэрэглэнэ.
4.2.    Шилдэг аж ахуйн нэгжийг олон нийтийн хэвлэл мэдээлэл болон сурталчилгааны самбарт  жилд хоёр удаа үнэ төлбөргүй сурталчилна.
4.3.    Шилдэг аж ахуйн нэгжийн мэдээлэл, сурталчилгааг Улаанбаатар хотын вэбсайт болон хотын лавлах номонд үнэ төлбөргүй тавина.