Монгол Улсын Ерөнхий сайд Л.Оюун-Эрдэнэ Засгийн газраас өргөн барьж буй Шинэ сэргэлтийн бодлогыг батлах тухай УИХ-ын тогтоолын төслийг уншиж танилцууллаа. Тэрбээр хэлсэн үгэндээ “Монгол Улсын Засгийн газраас цар тахлын үеийн эдийн засгийн эрчимжүүлэх, эдийн засгийн тусгаар тогтнол, бие даасан хангах бэхжүүлэх, “Алсын хараа-2050” Монгол Улсын урт хугацааны бодлого хэрэгжих суурь нөхцлийг бүрдүүлэх, хөгжлийн хязгаарлагч хүчин зүйлийг цаг алдалгүй шийдвэрлэх зорилго бүхий Шинэ сэргэлтийн бодлогыг батлах тухай УИХ-ын тогтоолын төслийг өргөн барьж, хэлэлцүүлж байна. Шинэ сэргэлтийн бодлого нь боомтын сэргэлт, эрчим хүчний сэргэлт, аж үйлдвэржилтийн сэргэлт, хот хөдөөгийн сэргэлт, ногоон хөгжлийн сэргэлт, төрийн бүтээмжийн сэргэлт гэсэн үндсэн зургаан багц асуудлаас бүрдэнэ.

Зургаан багц асуудлыг цаг алдалгүй шийдвэрлэх хөгжлийн 20 төсөл. Эдгээр төслийг цаг алдалгүй хэрэгжүүлэх хууль эрх зүйн шинэтгэлийн хүрээнд эхний ээлжинд 28 хуульд нэмэлт өөрчлөлт хийх, шинэчилсэн найруулга болон шинээр хууль өргөн барих зайлшгүй шаардлагатай зүйлийг тогтоолын төсөл хавсаргалаа. Дэлхий даяар цар тахлаас үүдэн экспорт тасалдаж, ачаа тээврийн эргэлт удааширч, өргөн хэрэглээний бараа бүтээгдэхүүний хомсдол үүсэж, дэлхийн гео политикийн хүчин зүйл давхацсан нэн хүнд цаг үед та бид эдгээр асуудлын үндсэн шийдэл болсон Шинэ сэргэлтийн бодлогыг хэлэлцэж байна. Цар тахлын үед Монгол Улсын эдийн засаг 1992 оноос хойш хоёр дахь удаагаа 5.3 хувь хүртэл агшлаа.

Цар тахал хэр удаан үргэлжилж, хэчнээн удаа хувьсан өөрчлөгдөхийг дэлхийн эрүүл мэндийн байгууллага өнөөдрийг хүртэл бүрэн тодорхойлж чадахгүй байна. Өргөн хэрэглээний бараа бүтээгдэхүүний хомсдол, үнийн өсөлт, Омикрон вирусний тархалт ирж буй 2022 оны томоохон сорилт болно гэдгийг дэлхийн банк санхүүгийн байгууллагууд онцолж байна. Монголчууд бид энэхүү сорилтоос гарах цорын ганц зам бол зөвхөн экспортын өсөлт юм. Монгол Улсын хөгжлийн хязгаарлагч хүчин зүйл болсон суурь дэд бүтэцийн болон засаглалын асуудлыг шийдвэрлэхэд эхний ээлжинд 57 их наяд төгрөг, бүрэн шийдвэрлэхэд 100-120 их наяд төгрөг шаардлагатай байна” хэмээн онцлон хэлэв.  

Б.Жаргал