Иргэний оролцоо нэгдэл намыг бүртгэхээс татгалзсан асуудлаар Улсын дээд шүүх хаалттай хуралдсан. Энэ хурлаар УИХ-ын гишүүн асан Ц.Оюунгэрэлийг ажиглагчаар оруулаагүй байна. Тэрбээр энэ талаар “Улсын дээд шүүх өөрсдөө дэгээ тогтоодог, парламентлаг олонхын саналаар хэлэлцдэг болжээ. Шүүн таслахаас бусад үйл ажиллагаа, шүүгч ямар асуудал хэлэлцсэн тухай хурлын тэмдэглэлийг мэдэх эрх яагаад байхгүй гэдэг асуудал гарна. Тиймээс шүүхийн шийдвэрүүдээс түүж энэ байгууллагад ажилладаг 23 шүүгчийн мэдээллийг анх удаа ил болгосон. Харин тэдний 15 нь онц ноцтой хэрэгт холбогдсон. Олон нийтийн мэдээллээс судлаад үзэхэд 15 шүүгч онц ноцтой гэмт хэрэгт холбогдож байжээ.

Үүнээс долоон шүүгч үндэслэлгүй хөрөнгөжсөн бол найман шүүгч нь мөнгө угаасан гэмт хэрэгт холбогдсон байна. Үүнээс гадна захиалгаар хэрэг шүүсэн, ЖДҮ-ийн хэрэгт оролцсон, газрын наймаанд холбогдсон хүмүүс ч байсан.

Гэсэн ч том хэрэгт орооцолдсон хэдий ч эрүүгийн хариуцлага хүлээж байгаагүй. Иймээс эрүүгийн хариуцлага хүлээгээгүй бол шүүгч байж болно гэдэг хуулийн шаардлагад нийцээд байдаг. Гэтэл иргэдийн итгэл хүлээх байгууллагын маань шүүгчдийн 62.5 хувь нь энэ төрлийн гэмт хэрэгт холбогдсон байна. Харин яагаад энэ хүмүүсийг томилоод ажиллуулаад байна вэ. Хэн томилсон бэ гээд харахаар олон жил би зөвлөхөөр нь ажиллаж байсан Ц.Элбэгдоржийг нэрлэхгүй бол болохгүй. Яагаад гэхээр эдгээр шүүгчдийн 17 нь түүнийг Ерөнхийлөгч байх үед томилогдсон хүмүүс. Зөвлөхөөр нь ажилладаг байхад Ц.Элбэгдорж хүний эрхийг дэмждэг хүн байсан, гэтэл нөгөө талдаа гэмт хэргийн биржийг бий болгосон байна. Түүний дараа Х.Баттулга Ерөнхийлөгч байхдаа таван шүүгчийг томилсон. Хамгийн сонирхолтой нь Ц.Элбэгдоржийн үед томилогдсон нэг шүүгч хэрэгт холбогдож, Х.Баттулга Ерөнхийлөгчийн үед түдгэлзсэн хэдий ч нэг жилийн дараа томилсон байсан” хэмээн хэллээ.

Т.Мөнхжаргал