Австрали Улсын Ерөнхий консулын газар Улаанбаатар хотноо албан ёсоор нээлтээ хийлээ.

Уг арга хэмжээнд Монгол Улсад албан ёсоор айлчилж буй Австралийн Гадаад хэргийн сайд ноён Боб Карр болоод Монгол Улсын Гадаад харилцааны дэд сайд Д.Ганхуяг нарын албаны хүмүүс оролцжээ.

Ерөнхий консулын газар Монгол Улсад үүд хаалгаа нээж байгаа нь хоёр улсын хооронд дипломат харилцаа тогтоосны 40 жилийн ойтой давхцаж буйгаараа онцлог бөгөөд хоёр орны ард түмэн хоорондын хэлхээ холбоог бэхжүүлэх, эдийн засаг, соёлын харилцааг хөгжүүлэхэд чухал хувь нэмэр оруулах юм. Австрали Улс нь Ази, Номхон далайн бүс нутаг дахь манай чухал түнш орон төдийгүй Монгол Улс дахь гадаадын шууд хөрөнгө оруулалтын үзүүлэлтээр тэргүүлэх байр эзэлж байна.