Цахим хөгжлийн багц хуулийн хүрээнд хэрэгжүүлж буй “Иргэнд мэдэгдэл хүргэх систем”-ийн талаар мэдээлэл хийж байна. Энэ үеэр Харилцаа холбоо, мэдээллийн технологийн газрын дарга Б.Болор-Эрдэнэ мэдээлэл өглөө.

Тэрбээр “Өнөөдрийн байдлаар E-mongolia платформд төрийн 60 байгууллагын 648 улсын хэмжээний үйлчилгээнүүд орсон байна. Мөн аймаг, орон нутгийн үйлчилгээнүүдийг цахимжуулах ажлыг эрчимтэй явуулж байна. Хөдөө орон нутагт гурван баг ажиллаж байна. E-Mongolia 2020 оны аравдугаар сарын 1-ны өдөр нээгдсэн. Нээгдсэнээс хойш нийтдээ 10 сая мэдээллийг иргэдэд хүргэсэн байна.

Мэдээлэл хүргэх системийн хувьд 2021 оны статистикийг аваад үзэхэд иргэдийн мэдээллийг 511 сая гаруй удаа сольсон байна. Ийм олон удаа сольж байгаа, хэн хаана ямар мэдээллийг сольж байгааг иргэн хянах боломжгүй байсан. Үүнийг Нийтийн мэдээллийн ил тод байдлын тухай хууль, хүний хувийн мэдээлэл хамгаалах тухай хуулиудаар зохицуулагдаж байна.

Тухайлбал, миний ямар мэдээлэл төрд байна, ямар мэдээлэл хувийн хэвшилд байна, хэн яаж ашиглаж байна гэдгийг иргэн хянах боломжтой болж байна. Өнөөдрийн байдлаар E-Mongolia апплекэйшнийг нэг сая удаа татсан байна. Тэгэхээр нэг сая иргэн өөрийнх нь ямар мэдээллийг хэн харсан гэдгийг харах боломжтой болж байна. Мөн үндэсний И-мэйлийн системийн нэвтрүүлэхээр ажиллаж байна. Манай цахим орчинд гардаг хамгийн том асуудал бол залилан. Хүний бичиг баримтыг ашиглаж залилан хийдэг. Тиймээс и-мэйлээр харилцах боломжтой болж байна. Аппликейшнээ шинэчлэснээр хэн хаанаас, хэдэн цагт таны мэдээллийг харсан байна гэдгийг жагсаалтаар харах боломж бүрдэнэ. Цахим хөгжлийн багц хуулинд төрд байгаа мэдээллийг иргэнээс нэхэхийг хориглосон. Энэ заалт тавдугаар сарын 1-с хэрэгжиж эхэлнэ. Мөн багц хуулиуд дээр ялын бодлого чанга орж ирж байгаа. Тухайн мэдээллийг алдсан ажилтан дээр 5-10 жил хүртэлх ял оногдуулна” гэв. 

Д.Батчулуун