УИХ-ын Халдашгүй байдлын дэд хорооны хуралдааны дараа Улсын ерөнхий прокурор Б.Жаргалсайханы хийсэн мэдээллээс онцлох таван эшлэлийг хүргэе.

• Дөрвөн гишүүнийг эрх мэдэл албан тушаалаа урвуулан ашигласан гэдэг үндэслэлээр мөрдөх байгууллага санал ирүүлсэн. Прокурор хянаад үндэслэлтэй гэж үзсэн учир яллагдагчаар татсан. Тийм учраас энэ дөрвөн гишүүнийг Эрүүгийн хуулийн тусгай ангийн 22.1 дүгээр зүйлээр эрх мэдэл, албан тушаалынхаа байдлыг урвуулан ашигласан гэдэг үндэслэлээр яллагдагчаар татсан.

• Дөрвөн гишүүнийг ялллагдагчаар татсан учраас бүрэн эрхийг түдгэлзүүлэх санал тавьж байгаа. Одоогийн байдлаар өөр яллагдагчаар татагдсан гишүүн байхгүй. Нэмж орж ирэх гишүүд дээр хоёр асуудал бий. Нэгдүгээрт, Хөгжлийн банктай холбоотой 29 хэрэг хэрэг бүртгэлтийн шатанд байгаа. Хэрэг бүртгэлтийн хэрэг гэдэг нь нотлох баримтыг цуглуулах үйл явц.

• Бусад гишүүдтэй холбоотой асуудлыг яагаад түдгэлзүүлээгүй юм бэ гэвэл Эрүүгийн хэрэг хянан шийдвэрлэх хуулиар мөрдөн шалгах 31 ажиллагаа байна. Прокурорын зөвшөөрлөөр 18, мөрдөгч өөрөө дангаараа хийдэг 13 зөвшөөрөл байна. Бусад нотлох баримтаар нотлогдсон тохиолдолд заавал гишүүний бүрэн эрхийг түдгэлзүүлэхгүйгээр шийдэх хуулийн боломж бий. Тийм учраас бусад гишүүдийг эрх бүхий байгууллага, тухайлбал мөрдөх байгууллагын санал ирээгүй учраас оруулж ирээгүй байгаа.

• Өнөөдрийн байдлаар Хөгжлийн банкны хэргээр яллагдагчаар татсан хүн 42 байгаа. Шалгах процесс явагдаж байна. Сонсголын үеэр Хөгжлийн банкны хохирлын эргэн төлөлт 120 орчим тэрбум төгрөг байсан бол өнөөдөр 167 тэрбум байна.

• Төрийн болон албаны нууцыг гурван зэрэглэлээр авч үздэг. Онц чухал нууц,төрийн нууц, албаны нууц гэж гурван зэрэглэл байдаг. Дөрвөн гишүүний бүрэн эрхийг түдгэлзүүлэх санал бол албаны нууцын зэрэглэлээр орж ирж байгаа. Гэм буруугүйн асуудлыг шийдээгүй учир нээлттэй хэлэлцэх нь буруу.

А.Сүх