-Юун түрүүнд Голомт банкны Facebook хуудсанд зарлагдсан шилдэг сэтгэгдлийн уралдааны ялагч болсонд баяр хүргэе! Өөрийнхөө тухай болон Голомт банктай холбогдcон анхны дурсамжаасаа бидэнтэй хуваалцахгүй юу?

Баярлалаа. Намайг Мөнхчулуун овогтой Билгүүн гэдэг. 2008-2010 оны хооронд “Голомт банкны тэтгэлэгт 100 оюутан” хөтөлбөрт тэнцэж тэтгэлэгт оюутан болсон. Голомт банкнаас тэтгэлэг хүртэж байсан оюутнуудын дунд зарлагдсан сэтгэгдлийн уралдаанд түрүүлсэндээ баяртай байна. Тэтгэлэг авахад ямар байсан, надад ямар түлхэц болсон цаашид би хэрхэн ажиллах вэ гэдгээ товч тодорхойлохыг зорьсон.

-Уралдаанд ирүүлсэн сэтгэгдлүүдийг уншиж байхад, оюутнуудын хувьд тэтгэлэг санхүүгийн гэхээсээ илүүтэй сэтгэл санааны дэмжлэг болдог юм шиг санагдсан. Өөрийн чинь хувьд?

Миний хувьд энэ тэтгэлэг тухайн үед санхүүгийн болоод сэтгэл санааны томоохон дэмжлэг болж байлаа. Гэхдээ эргэцүүлэн дүгнэхэд Голомт банк тэтгэлэгт оюутнуудадаа тэтгэлэгээ хамгаалах үүргийг сайтар  ухамсарлуулж, тогтвортой амжилт үзүүлэх шаардлага тавьдаг нь тэднийг өөртөө итгэлтэй бөгөөд хариуцлагатай суралцах ёстой гэсэн сэтгэл зүйг илүү хүчтэйгээр дэмжиж чаддаг гэж би боддог. Улирал бүр тэтгэлэгт оюутны хэрхэн суралцсан, ямар амжилт гаргасан талаарх мэдээллийг байнга шалгадаг бөгөөд “даалгавар”-аа биелүүлсэн оюутанд тэтгэлэгээ үргэлжлүүлэн авах эрх олгодог байсан нь санхүүгийн дэмжлэгээс илүүтэйгээр сэтгэл зүйд нь тулгуурласан зөв бодлого юм.

-Тэтгэлгийн мөнгөө тухайн үед юунд зарцуулж байсан бол?

Эдийн засаг маркетингийн ном сэтгүүл, принтерийн хор, үлдсэнийг нь хадгалдаг байсан.
-Дотоодын болон гадаадын их дээд сургуулиудыг амжилттай төгсөж одоо эх орныхоо хөгжилд гар бие оролцохоор ирээд байна.

Аль салбарт хүч соривол хөгжилд оруулах хувь нэмэр тань илүү юм шиг санагдаж байна?

Манай улс шиг хэврэг эдийн засагтай, далайд гарцгүй, ажиллах хүчээ гадагшаа экспортлон, логик уялдаа холбоо багатай, урсгалаараа хөгжиж буй оронд үндэсний үйлдвэрлэлээ хөгжүүлж, ажлын байрыг нэмэгдүүлэн эдийн засгийн хараат байдлаа багасгах нь хамгаас чухал. Улс эх орноо хөгжүүлэхэд хүн өөрийн хамгийн сайн чадах зүйлээрээ гар бие оролцох хэрэгтэй. Миний хувьд аж үйлдвэр, хөдөө аж ахуй болон биоэкономик чиглэлд хүчээ сорих бодолтой байна. 

-Боломж хүн бүрийн өмнө нээлттэй байдаг гэдэгтэй санал нэгддэг үү? Зарим оюутнуудын хувьд тэтгэлэг авна гэдэг тасарчихсан гойд авьяастнуудын оролцдог зүйл мэтээр ойлгодог?

Тэтгэлэг авч буй оюутнуудын дунд гайхамшигтай авьяастай залуус олон бий. Үүний хажуугаар зөв бодолтой, ирээдүйтэй, тэтгэлэгт хөтөлбөрийн шаардлагыг хангаж зорилгыг биелүүлэх нөөц бололцоотой олон залуус хамрагддаг. Тэтгэлэг зөв хүндээ очиж чадвал маш үр дүнтэй. Тийм учраас сэтгэлээр уналгүй байж өөдрөг сэтгэлгээтэйгээр өөрт буй хамгийн сайн сайхан, ур чадвараа шавхаж өрсөлдөх хэрэгтэй. Хэрвээ хасагдвал бууж өгөх хэрэггүй, өөдрөг байж илүү чармайх хэрэгтэй. Учир нь хүн бүрийн өмнө боломж нээлттэй боловч тоотой байдаг.

-Өнөөгийн боловсорсон залуу хүний нийтлэг өдөр хэрхэн өнгөрдөгийг өнгийж хармаар санагдлаа?

Хоногийн 24 цагаас тогтмол 10 цагийг ажил албанд зориулдаг, 7.5-8.5 цагийг нойр сэлбэж амрахад, 2 цагийг ямар нэгэн зүйлд тусгайлан суралцахад, харин үлдсэн цагийг хувийн сонирхол, бусад болон хийх дуртай зүйлдээ зарцуулдаг. Хоногт хэрвээ 25 цаг байсан бол илүү 1 цагийг өөрийн сонирхдог зүйлдээ зарцуулах болно. Харин амралтын 2 өдөр ихэвчлэн гэр бүлийхээ болон хувийн ажлаа амжуулж, амарч авдаг. Зарим өдрүүдэд замын түгжрээ болон бусад асуудлаас хамаарч цагийн хуваарь алдагдах тохиолдол бий.

-Өөрийн тань өмнө Голомт банкны тэтгэлгийг анх удаа авахаар, сэтгэл догдлон буй оюутан зогсож байна гэж бодъё. Баярыг нь мялааж, бас урмыг нь сэргээх ямар үг хэлмээр байна?

Энэ бол зөвхөн эхлэл. Гэхдээ маш сайн эхлэл. Тэтгэлгээ битгий алдаарай. Амжилт хүсье!

-Манай уншигчидтай хамгийн сүүлд сонссон “шинэ мэдээ”-гээ хуучрахаас нь өмнө хуваалцаач гэвэл юуг онцлох бол? Үүгээр яриагаа өндөрлөе!

Евро бүсийн өрийн хямрал даамжирч, Хятад улсын эдийн засгийн өсөлт саарч 7.6 хувьд хүрсэн. Манай улс гадаад валют нөөцөлж, эдийн засгийн бэлтгэлээ сайн хангах хэрэгтэй.