АНУ-ын Шинэ Орлеоны Хүүхдийн эмнэлгийн гадна Э.Сүндэр гэх монгол эмэгтэй долоон сартай хүүгийнхээ хагалгааны дараа эхэр татан уйлж байв. Гэхдээ тэрбээр баярласандаа хүүхэд шигээ чангаар уйлж байжээ. Долоон сартай Очир хүүд яаралтай зүрхний цоорхой нөхөх эмчилгээ хийх болж, “Heart gift” гэдэг АНУ-ын сайн дурын байгууллага төлбөрийг нь даах болсон талаар 24tsag.mn өмнө нь мэдээлж байсан. Тэгвэл долоохон сартай бяцхан хүүгийн мэс засал амжилттай болсон сайхан мэдээг дахин дуулгаж байна. 
    Долоон сартай Очир хүүг дөнгөж төрснийх нь дараа зүрх нь цоорхой гэсэн гашуудам мэдээг эмч нар ээж Э.Сүндэрт нь дуулгасан байна. Ийм өвчтэй хүүхдүүдийн адил найман сар хүрэхээс нь өмнө заавал хагалгаа хийлгэх ёстой. Хоёр, гурван нас хүрвэл эмчилгээ хийх боломжгүй болдог гэж эмч нар хэлжээ. Гэхдээ ийм хагалгааг Монголд хийх боломжгүй тул ээж, аав нь энэ хугацаанд Орос, Хятад, Солонгос, АНУ-ын эмнэлгүүдийг судалсан байна. Азийн оронд зүрхний цоорхойг нөхөхөд 60 мянган доллар, харин АНУ-д 100 мянган доллар байдаг. Тиймээс тэд хүүгээ гадаад руу авч явж эмчлэх зардал, хандив хайж эхэлсэн байна. Азаар тэд өнгөрсөн дөрөвдүгээр сард АНУ-ын Техас мужид төвтэй “HeartGift” гэдэг төрийн бус байгууллагатай интернэтээр холбогдож чаджээ. “HeartGift” нь Монгол зэрэг хөгжиж буй орнуудын зүрхний эмгэгтэй хүүхдүүдэд туслах зорилготой сайн дурын байгууллага аж. Аз тохиосон ээж, хүү хоёр өнгөрсөн сард гучин цаг ниссэний дараа АНУ-ын Шинэ Орлеонд ирж, 9-р сарын 20-нд хагалгаа хийлгэсэн байна.

  Хүү хагалгааны дараах эхний хоёр наркозинд байсан тул ээж нь хэрхэхээ мэдэхгүй ихэд сандруу, сэтгэл нь үймэрч байсан аж. Харин наркоз нь гарахад хүү ухаан орж, ухаан орсон даруйдаа уйлжээ. Гэхдээ ямар ч дуу шуугүй, зөвхөн нулимс нь урсаж байсан гэж ээж Э.Сүндэр нь ярьсан байна. Очир хүү эхэндээ амьсгалахдаа цээж хэсэгтээ хөндүүрлэж байсан ч долоо хоногийн дараа гэхэд ямар нэг зовиургүй бусад хүүхэд шиг эрүүл болоод байна. Тэднийг мэс засал хийлгэж, эмчлүүлж байх хугацаанд Сovington хотын иргэн Kendra France,  Kyle France нар харж хандаж, гэртээ суулгаж байгаа юм.
   Энэ мэс засалд “Heart gift” байгууллага 15 мянган доллар хандивласан бол эмнэлэг нь үнэгүй мэс засал хийж өгчээ. Очир хүүгийн бие санаснаас хурдан тэнхэрч байгаа тул удахгүй Монголдоо, гэртээ ирнэ. Э.Сүндэр бүсгүй хүүд нь амьдрал бэлэглэсэн ачтай хүмүүст баярлаад барахгүй байгаагаа хэлжээ. Очир хүүгийн ээж: “Тэр одоо бусад шиг сууж, өнхөрч, уйлж, тоглож чадна. Тэр амьдрах болно...”