Эрүүл мэндийн яам, Цагдаагийн ерөнхий газраас зохион байгуулж буй “Аажуу явбал аяндаа хүрнэ” аян орон даяар энэ сарын 20-ний өдрөөс эрчимтэй үйл ажиллагаагаа явуулж байна.Тус аяны хүрээнд Чингэлтэй дүүргийн 19 дүгээр хорооны нутаг дэвсгэрт зөөврийн хурд хэмжигч байршуулан аяны цаг хүрээгээ тэлсээр байна. Тус хурд хэмжигчийн талаар Чингэлтэй дүүрэг дэх цагдаагийн газрын замын цагдаагийн хэлтсийн зохицуулагч цагдаагийн дэслэгч М.Өнөрцэцэг мэдээлэл өглөө.
Тээврийн цагдаагийн албанаас “Аажуу явбал аяндаа хүрнэ” гэсэн арга хэмжээ зохион байгуулагдаж эхэлсэн. Энэ аяны хүрээнд Чингэлтэй дүүргийн замын цагдаагийн хэлтэс бүрэн бүрэлдэхүүнээрээ оролцож байна. Одоогоор Чингэлтэй дүүргийн 19 дүгээр хорооны нутаг дэвсгэрт зөөврийн хурд хэмжигч байршуулан хурд хэтрүүлэхгүй байх талаар урьдчилан сэргийлэх арга хэмжээ үргэлжилж байна.
Зөрчлийн тухай хуулийн 17.31-д зааснаар авто суурин дотор явах хурдны дээд хэмжээг хэтрүүлсэн бол тухайн тээврийн хэрэгслийн жолоочийг 50 нэгж буй 50.000 төгрөгөөр торгох арга хэмжээг ноогдуулах ба хоёр оноо хасагддаг. Хурдны заалтыг 50 хувиас дээш хэтрүүлсэн тохиолдолд жолоодох эрхийг 6 сараар хасаж мөн 50 нэгжээр торгодог.
Хоёр цагийн үйл ажиллагаа явуулахад 70-80 орчим тээврийн хэрэгсэл дээр арга хэмжээ тооцоод байна. Иймд нийт хөдөө орон нутаг болон хот суурин дотор тээврийн хэрэгсэл жолоодож яваа иргэд хурдаа тохируулж явах зайлшгүй шаардлагатай. 42500 орчим хүн зам тээврийн ослын улмаас бэртэж гэмтсэн, 500 орчим хүн нас барсан байдалтай байна. Тэгэхээр жолооч нар хурдаа тааруулж яваарай, “Аажуу явбал аяндаа хүрнэ” гэв.
Д.Бат-Эрдэнэ, М.Балжинням