24 tsag.mn “Хобби” булангийнхаа энэ дугаарт боксын спортын эд хэрэгсэл цуглуулах дуртай тэр дундаа бээлий хурааж хадгалах хоббитой зуу зуун сонирхогчдоос зөвхөн олны танилуудыг нь онцлон хүргэж байна.

Өөр өөр ажил мэргэжил, хүсэл мөрөөдөлтэй хүмүүс хоббигоороо нэгдэж холбогддогийн жишээг эндээс харж болно. Ижил хоббитнуудын жагсаалтыг боксчин Э.Бадар-Ууган, П.Сэрдамба, У.Мөнх-Эрдэнэ, Монголын боксын холбооны хүндэт ерөнхийлөгч УИХ-ын гишүүн асан Ш.Сайхансамбуу мөн “Guys” хамтлагийн дуучин Мягмар нар тэргүүлж байна. Эд нарын хэн хэн нь боксын бээлийний арвин цуглуулгатай.

Лондонгийн олимпийн хүрэл медальт, МУГТ У.Мөнх-Эрдэнэ, УИХ-ын гишүүн асан Ш.Сайхансамбуу нарын цуглуулгад боксчдын өмс тоглодог том бээлийнээс гадна  бэлэг дурсгал, бэлэг тэмдгийн зориулалттай жижигхэн бээлийнүүд ч байдаг. Брэндийн болон AIBA буюу олон улсын боксын холбоонд нэгдэн орсон орнуудын логотой бээлийнүүд их байдаг. У.Мөнх-Эрдэнийн хувьд тэмцээнд орсон улс орон болгоноос жижигхэн бээлий авч цуглуулгаа аривжуулдаг бол Ш.Сайхансамбуу Монголын боксын холбооны ерөнхийлөгчөөр ажиллаж байхдаа “Нарантуул” гэсэн лого бүхий ногоон өнгийн аварга том боксын бээлийг захиалгаар хийлгэсэн байна. Тэрээр энэ аварга бээлийн дээрээ найз нөхөд нь дэмждэг боксчдынхоо өгсөн дурсгалын жижигхэн бээлийнүүдийг зүүж хадгалдаг гэсэн. Түүний бээлийний цуглуулгыг зэрвэсхэн харахад шинэ жилийн чимэглэсэн гацууртай адилхан харагддаг. Бас нэгэн бээлийн цуглуулах хоббитонгуудад Н.Төгсцогт багтана. Сүүлийн жилүүдэд Монголын ширэн бээлийтнүүд  амжилтын буухиагаа үргэлжлүүлж тив дэлхийд өндөр амжилт гаргаж байгаа. 17 настай Н.Төгсцогт хүү ДАШТ-ний мөнгөн медалийн эзэн болж дэлхийн бокс сонирхогчдын анхаарлыг татсан нь саяхан. Тэрээр мөн боксын бээлийний арвин цуглуулгатай. Бээжингийн олимпийн мөнгөн медальт, Хөдөлмөрийн баатар, МУГТ П.Сэрдамба ч олимп, ДАШТ-д оролцох бүрдээ шинэ бээлийн авдаг аж. П.Сэрдамба Майкл Жексон шиг нэр алдартай бол “Сэрдамбийн музей” байгуулах байсан гэдэг. Эндээс харахад боксынхон өөрсдийн хэрэглэлээ цуглуулж хобби болгожээ. 

Харин “Guys” хамтлагийн дуучин М.Мягмарийг харахад дээрхээс арай өөр ойлголт төрнө. Гэсэн ч түүний гэрт хэд хэдэн боксын бээлий харагдана.

Дасгалжуулагч Д.Бандийн гэрт боксын бээлий бэлэг тэмдэг мэт байж байдаг.