УИХ-ын Тамгын газар, АНУ-ын Бүгд Найрамдахчуудын Олон Улсын хүрээлэнтэй хамтран “ УИХ-ын гишүүний туслахууд, Нийслэлээс сонгогдсон Улсын Их Хурлын гишүүний бие төлөөлөгч – туслахуудад зориулсан сургалт” -ыг өнөөдөр /2012.10.12/ Төрийн ордноо зохион байгуулж байна.Уг арга хэмжээг УИХ-ын Тамгын газрын Захиргаа, боловсон хүчний хэлтсийн дарга Л.Пүрэвжав нээж хэлсэн үгэндээ, УИХ-ын үйл ажиллагааг чадавхжуулах, сайжруулахад гишүүдийн туслахууд ихээхэн үүрэгтэй байдаг. Монгол Улсын парламент дөрвөн жил тутам шинээр бүрдэж, тэр хирээр туслах, бие төлөөлөгчид шинэчлэгдэж байдаг учраас УИХ-ын Тамгын газрын зүгээс нягт хамтран ажиллахыг эрмэлздэг. УИХ-ын чадавхийг бэхжүүлэх үүднээс УИХ-ын Тамгын газар, АНУ-ын Бүгд Найрамдахчуудын Олон Улсын хүрээлэнтэй хамтран 10 гаруй жил олон төсөл, хөтөлбөрүүдийг амжилттай хэрэгжүүлж ирсэн. Та бүхэнд талархаж байгаагаа илэрхийлье гэв.
АНУ-ын Бүгд Найрамдахчуудын Олон Улсын хүрээлэнгийн Монгол дахь суурин төлөөлөгч ноён Р.Бежар туслахуудын ажлыг хөнгөвчлөх, тус дэм болох үүднээс өнөөдрийн арга хэмжээг зохион байгуулж буйгаа хэлээд өөрөө ч АНУ-ын Конгресс, мужийн хууль тогтоох байгууллагуудад ийм ажил хийж байсан туршлагатай гэдгээ онцоллоо. Мөн тус хүрээлэн нь дэлхийн 60 гаруй оронд ардчилсан тогтолцоог төлөвшүүлэх чиглэлээр үйл ажиллагаагаа явуулдаг. Монгол Улсын тухайд улс төрийн намууд, орон нутгийн өөрөө удирдах ёсны байгууллага, УИХ-ын чадавхийг бэхжүүлэхэд голлон ажиллаж ирснээ тэмдэглэж, хүрээлэнгийнхээ талаар товч танилцуулга хийсэн юм.
Эхний лекцийг АНУ-ын БНОУХ-ийн суурин төлөөлөгч ноён Р.Бежар “Парламентын гишүүний бие төлөөлөгч – туслахын үүрэг, тойргийн иргэдэд хүрч ажиллах арга хэлбэр” сэдвээр хийв. Тэрээр, Гишүүдийн иргэдтэй хэр ойр ажиллах нь туслахуудаас шууд хамааралтай. Туслах, бие төлөөлөгчдийн анхаарах хамгийн чухал гурван зүйл нь иргэд, сонгогчдын санал хүсэлтийг хүлээн авснаа нотлох, ямар арга хэмжээ авч буйгаа мэдэгдэх, санал хүсэлт хэрхэн шийдэгдсэн талаар иргэнд эргэн мэдээлэх юм. Парламентын гишүүний үйл ажиллагааг байнга мэдээлж, сурталчилж байх хэрэгтэй. Үүгээр зогсохгүй иргэдээс шийдвэрлэх боломжгүй, эрх мэдлээс давсан хүсэлтүүд ихээр ирдэг. Үүнийг орхилгүй туслахыг хүсч байгаагаа ойлгуулж, хаана, хэнд хандахыг зааж өгөх, төр засгийн байгууллагуудын үйл ажиллагааны чиг үүргийг тайлбарлах зэргээр эерэг сэтгэгдэл төрүүлэх нь зүйтэй. УИХ-ын гишүүн, иргэдийг нягт холбож өгөх нь гишүүнд тойрогт нь ямар асуудал тулгамдаад байгаа, төрийн аль үйлчилгээ шаардлага хангахгүй байгаа зэрэг олон асуудлыг бодитоор мэдэхэд чухал ач холбогдолтой хэмээн онцоллоо.
Тус хөтөлбөр бүтэн өдрийн турш үргэлжлэх бөгөөд УИХ-ын Тамгын газрын ажилтнууд, МУБИС, Удирдлагын академийн багш нар Олон нийттэй харилцах харилцааны сэтгэл зүй, Төрийн бодлогын явц дахь иргэдийн оролцоо, Төрийн албан хаагчдын манлайлал ба ёс зүй зэрэг сэдвүүдээр лекц унших юм.
