НДЕГ-ын дарга Д.Зоригтыг ажлын байрандаа мөрийтэй тоглоом тоглосон гэх мэдээлэл Засгийн газар иргэдийн санал, хүсэлтийг хүлээн авдаг 1111 тусгай дугаарт иржээ. Энэ талаар Ерөнхий сайдын Хэвлэлийн төлөөлөгч Ч.Болортуяа мэдээлж, Засгийн газрын хуралдаанаас гарсан шийдвэрийг танилцууллаа. 

Тэрбээр "Төрийн хяналтыг сайжруулах зорилгоор Ерөнхий сайд дэргэдээ 1111 төвийг ажиллуулж, төрийн байгууллагуудтай холбоотой гомдол саналыг шуурхай шийдвэрлэх чиглэлээр ажиллаж байна. Энэ үеэр НДЕГ-ын дарга Д.Зоригттой холбоотой гомдол 1111 төвд ирсэн. Уг гомдол мэдээлэл нь гэрэл зургаар нотлогдсон тул Ерөнхий сайд холбогдох албан тушаалтныг чөлөөлөх үүргийг ХНХ-ын сайдад өгсөн.

Төрийн албан хаагч мөрийтэй тоглохыг хуулиар хориглодог. Мөн албан тасалгаандаа мөрийтэй тоглосон эсэхийг шалгах, уг мөрийтэй тоглоомд төрийн өөр албан тушаалтан оролцсон бол хариуцлага тооцох үүргийг ХЗДХ-ийн сайд өглөө" гэв.

НДЕГ-ын дарга Д.Зоригт нь 2018 оноос өнөөдрийг хүртэл Нийгмийн даатгалын ерөнхий газрын даргаар ажиллав. Сонирхуулахад, тэрбээр Уул уурхай, хүнд үйлдвэрийн сайд Ж.Ганбаатартай холбоотой хүн юм.

Д.Батчулуун