Дэлхийн аль ч улс орны төрийн тэргүүнээс эхлээд хүн бүрийн сэтгэлийг зовоодог асуудлын нэг бол дэлхийн цаг агаарын дулаарал, байгаль экологийн тэнцвэртэй байдал алдагдан цөлжилт эрчимтэй явагдаж байгаа явдал юм. Өнөөдөр хүн бүр эх дэлхий, онгон байгалиа хайрлан хамгаалж, цөлжилттэй тэмцэхийн тулд ногоон модоо олноор тарьж ургуулах хэрэгтэй.

            Монгол Улсын Ерөнхийлөгч санаачлан энэ өдрийг “Мод тарих үндэсний өдөр” болгон зарласан нь байгаль дэлхийгээ хайрладаг уламжлалт монгол зан заншлаа дээдэлж, хүн бүр байгалиа нөхөн сэргээхэд гар бие оролцсон үндэсний хэмжээний хөдөлгөөн болон өрнөж байна.

            Сүүлийн үед хот суурин газарт иргэд олноор шилжин суурьшиж, хотын агаарын болон хөрсний бохирдлыг нэмэгдүүлж энэ нь иргэдийн амьдрах орчин, эрүүл мэндэд сөрөг нөлөө үзүүлж байна. Бид цэвэр цэмцгэр, эрүүл агаартай аюулгүй орчинд ажиллаж амьдарч, үр хүүхдээ эрүүл саруул өсгөн бойжуулах ёстой.  

            Бидэнд агаарын бохирдлыг бууруулж, цэвэр агаар бэлэглэх гол эх үүсвэр бол ой мод, төгөл юм. Өнөөдөр би нийслэл хотоо өнгө үзэмжтэй, цэвэр агаартай хот болгохын төлөө мод тарьж байгаадаа баяртай байна.

Хүн бүр хавар намар хоёрт нэг нэг удаа мод тарих хэрэгтэй. Та бүхэн өөрсдийн ойр дотно хүмүүс болон үр хүүхдүүдийнхээ сайн сайхны төлөө, иргэн бүр эрүүл цэвэр агаараар амьсгалахын жил бүр хоёр мод тарьж байхыг уриалж байна.

            Өвөг дээдэс маань “Нэг мод тарьвал мянган маани уншсантай адил” гэж хэлдэг. Өнөөдөр бид мод тарьж нас нэмэх буян үйлдэж байна.

            Сайн үйлс, буян хишиг дэлгэрэх болтугай.