АНУ-ын Жоржиа мужийн Атланта хотод байдаг "Fernbank Museum"-д Чингис хааны тухай үзэсгэлэн гарч байна. Үзэсгэлэн 10-р сарын 5-ны өдөр нээгдсэн бөгөөд зохион байгуулагчид дэлхий даяар нэрийг нь мэддэг хэрнээ цаад түүхийг нь ихэнхи хүн сайн мэддэггүй тул Монголын Чингис хааныг сонгон үзэсгэлэн гаргасан байна. Энд Чингис хааны хөшөө, түүхийн зарим сурвалж бичгүүд тавигдсан бөгөөд байлдан дагууллын үед монгол цэргүүдийн хэрэглэж байсан эд зүйлсийг дэлгэжээ. Мөн 13-р зууны үед байсан монгол гэр ч байгаа гэнэ. Зохион байгуулагчид "Чингис хааныг эзлэн түрэмгийлэгч гэдэг ч тэрбээр дэлхийн хөгжилд олон шинэчлэл авчирсан. Үзэгчид энд ирээд энэ түүхэн хүний тухай өөрсдийн дүгнэлтээ хийх байх" хэмээн онцолж байна.
    Чингис хааны тухай үзэсгэлэн "Fernbank Museum"-д 2013 оны нэгдүгээр сарын 21 хүртэл үргэлжилнэ.