Замын хөдөлгөөний удирдлагын төвөөс Сар шинийн баярын өдрүүдэд авто замын нөхцөл байдлыг хэрхэн зохицуулах талаар мэдээлэл өгч байна. Энэ үеэр ЦЕГ-аас мэдээлэл өглөө.
Тэрбээр"Цагаан сарын үеэр 3000 гаруй уулзвар гарцууд дээр хүн хүч байршуулан ажиллах шаардлага үүсэж байгаа. Үүний гуравны нэгт хүн хүч тавьж ажиллах бололцоотой байна. Шинийн нэгэн хоёрны өдрүүдэд гэр хороолол, зах руу чиглэсэн хөдөлгөөн их байдаг. Тиймээс замын хөдөлгөөнд оролцохдоо эгнээ байраа солихгүй, зэргэлдээх нутаг дэвсгэр буюу гэр хорооллоор дамжих зорчихгүй байх шаардлага үүсэж байгаа юм. Иймд нийт хөдөлгөөнд оролцож буй иргэддээ замын хөдөлгөөний дүрмийг зөрчихгүй байхыг анхааруулж байна.
Мөн цагаан сарын үеэр бага насны хүүхдийг хараа хяналтгүй байснаас болж хүүхэд амь насаа алдах тохиолдол бий. Тиймээс бага насны хүүхдэдээ анхаарал тавихыг зөвлөж байна.
Шинийн гурванаас хойш орон нутаг руу чиглэсэн хөдөлгөөн нэмэгддэг. Иймд орон нутаг руу зорчихдоо гэрлээ шилжүүлэх, ядарсан үедээ тээврийн хэрэгсэл жолоодохгүй байх, хамгаалах бүсийг бүх зорчигчдодоо зүүлгэх зэрэг асуудлууд дээр анхаарах хэрэгтэй. Орон нутаг руу чиглэсэн хөдөлгөөний улмаас осол, гэмтэл их гардаг учир иргэддээ анхааруулж байна.
Цагаан сарын үеэр хөдөлгөөн зохицуулалтыг уртасгасан цагаар хийж, ажиллана. Мөн замын хөдөлгөөний зохиомол ачаалал үүсгэхгүй зорчихыг зөвлөе. Цагдаагийн байгууллагын алба хаагчдын тавьж буй хууль ёсны шаардлагыг биелүүлж хөдөлгөөнд оролцоорой. Зах худалдааны төвөөр үйлчлүүлэхдээ автомашинаа зогсоолд зөв байрлуулахыг анхааруулж байна" гэв.
Д.Батчулуун
