Өвөр Монголын Баяннуур аймгийн Урадын хошууны монгол үндэсний бага сургуульд "Монголоороо байгаасай" сэдэвтэй өдөрлөг болжээ. Тус сургуулийн багш нар сурагчдаа багаасаа монгол соёлоо мэддэг, хайрладаг, эрхэмлэдэг байгаасай хэмээн энэхүү өдөрлөгийг зохион байгуулсан аж. Уг өдөрлөгөөр таван хошуу малын сийлбэр, хатгамал, монгол ахуйн модон эдлэл, цагаан идээ, сур, монгол гэрийн сийлбэр, өлгий, монгол үндэсний хувцас зэргийг дэлгэн үзүүлжээ. Мөн ахмад багш нар монгол ёс заншлын талаар хичээл заасан байна.