Монголын бензин шатахууны гол нийлүүлэгч “Роснефть” компани бензин шатахууны үнээ 50 ам.доллараар нэмэхээ мэдэгдлээ. Гэнэт ингэж бензиний үнээ нэмэх болсон шалтгаан нь Тавантолгойн төсөл, төмөр зам барих асуудал, онгоцны түлшинд монополь тогтоох, Улаанбаатарт 100 ширхэг шатахуун түгээх станц барих хүсэлтэд Монголчууд татгалзсантай холбоотой байж болох юм гэж эдийн засагчид таамаглаж байна. Нөгөө талаар Тавантолгой, төмөр замын асуудалтай холбоотой байж ч болох юм. Манай улс цахилгаан эрчим хүч, газрын тосны бүтээгдэхүүнээрээ ОХУ-аас хараат байдалтайг далимдуулж оросууд Монголыг хяналтдаа байлгах гэдэг өнцгөөс биднийг шахаж байна.

Дэлхийн зах зээл дээр газрын тосны бүтээгдэхүүний үнэ унаж байхад “Роснефть” компани зөвхөн Монголд зориулж үнэ нэмж байгааг зах зээл дээрх худалдаж байгаа нөхцөлтэй хамаагүй, гаргалгаа нь улстөр гэдэг нь харагдаж байна. Саяхан ОХУ-ын Засгийн газар экспортын татвараа 3-4 хувиар төрөл бүр дээр нь буулгасан.

Ердөө нэг сарын өмнө нэг тонн дизель түлшний үнийг 90 ам.доллар, А92 бензин 44 ам.доллар, А80 бензин 32 ам.доллараар нэмж, нийлүүлэхээ “Роснефть” компани мэдэгджээ. Манайд нефтийн үнэ хөдлөхөд өргөн хэрэглээний бараа бүтээгдэхүүний үнэ болон дагаад бүх зүйлийн үнэ хөдөлдөг. Ингэхлээр Монголын Засгийн газар өвлийн хүнд үед үнэ нэмүүлэхгүйн тулд улсын нөөцөөс гаргах, шатахуун импортлогч компаниудад нэмэлт санхүүжилт өгөх зэрэг шийдвэртэй арга хэмжээ авах байх.
Манай улсын шатахууны 60 хувийг нийлүүлдэг байсан “Роснефть” компани хүрээгээ тэлж, манайд сардаа 15 мянган тонн шатахуун нийлүүлдэг байсан Тюменийн нефтийн компани болох “ТНК-БП” компанийг худалдаж авсан. Энэ сард компанийн удирдлагын эрх хоёр компанийн хооронд шилжиж дуусна. Одоо бидний хэрэглээ дээрх ганц “Роснефть” компаниас 80 хувь хараат болж байгаа юм.
Ингэж Орос биднийг нефтийн үнээрээ шахаж эхэллээ. Бид Бээжингээс бензин авч болох ч хятадууд бүр илүү үнэ хэлж байгаа гэнэ. Монгол улс эрдэс баялгийн хувьд ерөөгдсөн ч газар зүйн байршлын хувьд хаагдсан, дэлхийд томд орох хоёрхон хөрштэй. Хаашаа ч хөдөлсөн дэлхийн том энэ хоёр гүрнийг нэвт туулж байж л зах зээлд гарна. Тиймээс экспорт, импорт нь үнэтэй болдог. Хөрш хаалгаа хаавал бүр экспорт импортгүй болно.

Ерэн оны нөхцөл байдал эргэн ирэх нь.Манайхныг дарамталж шахаж, тоглоомын зэвсэг болгох сонирхолтой юм. Нөхцөл байдал хүнд байхад том тоглоомын гар хөл болж хувьдаа хожоо олох гэсэн залуус ч монголчууд дотор маань бас байна гэнэ.

Бид олон жил ярьсан нефть боловсруулах, нүүрснээс шингэн түлш гаргах үйлдвэрээ ажил хэрэг болгохгүй бол Оросын шахалтанд нам дарагдах нь ээ.