Монгол наадмын дэвжээнд чимэг болон дэвж явсан улсын заан Д.Бумбаяр болон өнөө цагийн манлай бөхчүүдийн нэг, “жудагтай аварга” хэмээн олноо хүндлэгдсэн Монгол Улсын аварга С.Мөнхбат нарын төрсөн өдөр өнөөдөр тохиож байна.

Монгол Улсын аварга Сүхбаатарын Мөнхбат нь Увс аймгийн Баруунтуруун суманд 1984 онд төрсөн. Улсын наадамд 2009 онд тав давж улсын начин, 2010 онд зургаа давж харцага цол, 2011 онд Ардын хувьсгалын 90 жилийн ойн их баяр наадмаар 10 давж түрүүлснээр гурван жил дараалан улсын наадамд цолоо ахиулж, үндэсний бөхийн 22 дахь аварга болсон юм.

Харин улсын заан Дамирангийн Бумбаяр 1968 онд Увс аймгийн Тэс суманд төрсөн. 1993 онд тав давж улсын начин цолны болзол хангаж байсан бол 2001 онд долоо даван улсын заан цол хүртэж байв. Ингэснээр Тэс сумаас төрөн гарсан анхны заан цолтон болсон аж. Тэрбээр чөлөөт бөхөөр хичээллэн, олон ажмилт үзүүлж байжээ.