2012 оны УИХ-ын сонгуулиар МАХН-МҮАН-ын “Шударга ёс” эвслээс намын жагсаалтаар нэр дэвшсэн Ц.Оюунбаатар өнөөдрийг хүртэл УИХ-ын гишүүний тангаргаа өргөөгүй байгаа. Хэдийгээр түүний тангараг өргөх эрх нь нээгдсэн ч МАХН-ынхан түүний тангаргыг өргүүлэхгүй байгаа юм. Учир нь намынхан нь “Намын листэд Ц.Оюунбаатарын өмнө Н.Энхбаяр, Э.Батшугар нар байгаа. Тиймээс тэдний асуудал хэрхэхийг хүлээж байж, Ц.Оюунбаатарын тангараг өргөх эсэхийг шийднэ” хэмээн хүлээлгээд байгаа билээ. УИХ-ын гишүүний тангараг өргөх бүх эрх нь нээгдчихээд байхад түүнийг дэмжихгүй, хавчиж байгаад Ц.Оюунбаатар намынхандаа болон намын дарга Н.Энхбаярт ихээхэн гомджээ. Тиймдээ ч тангараг өргөж, гишүүн болвол АН-д элсэх гэж байгаа талаар эх сурвалж мэдээллээ. Учир нь АН-ынхан Ц.Оюунбаатарыг гишүүн болгож, намдаа элсүүлэх сонирхолтой байгаа юм байна. Тиймээс Ц.Оюунбаатарын тангаргыг өргүүлэхээр АН-ынхан сайн ажиллаж эхлээд байгаа аж.
Гэхдээ энэ нь цаанаа учиртай. Одоо Ардчилсан нам УИХ-д 31 суудалтай. Хэрвээ 39 суудал авбал олонх болж, засгийг дангаараа барих эрхтэй болно. Тиймээс УИХ дахь суудлаа нэмэгдүүлж, засгийг тогтвортой байлгах аргаа хэрэглэж байгаа аж. Гэтэл найман суудал дутаад байгаа тул АН-ынхан суудлаа нэмэхээр улайрч эхэлжээ. Ц.Оюунбаатараас гадна Өвөрхангайн хоёр суудал гээд боломжтой бүх аргыг хэрэглэж байгаа юм байна.
Харин энэ бүхнийг УИХ-ын дарга З.Энхболд найруулж байгаа хэмээн МАН-ынхан үзэж байгаа аж. Учир нь Ц.Оюунбаатар тангараг өргөх асуудлаараа УИХ-ын дарга З.Энхболдтой уулзсан мэдээлэл байгаа юм байна. Тиймээс МАН-ынхан үүнийг эсэргүүцэж эхэлжээ.
Уг нь Ц.Оюунбаатарыг тангараг өргөх боломжтойг СЕХ-ноос дахин баталсан. Тиймээс УИХ-ын Тамгын газар болон МАХН-ын дэд дарга Д.Тэрбишдагвад “Э.Батшугар бус Ц.Оюунбаатар УИХ-ын гишүүний тангараг өргөнө” гэх утга бүхий алба бичгийг хоёр удаа явуулсан байна.
Гэвч МАХН-ын энэ бүхнийг мэдсэн учраас Ц.Оюунбаатарын тангараг өргөхийг дэмжихгүй, хавчиж эхлээд байгаа аж.
Б.Золбоо
Сэтгэгдэл (21)