Бүх зүйл Ерөнхий сайд Л.Оюун-Эрдэнийн хүү О.Тэмүүлэнгийн найз охин Ө.Өгөөмөрийн инстаграм хаягийн сториноос эхэлсэн юм. Хорь гаруйхан настай залуугийн тансаг амьдралын мөнгөний эх үүсвэр хаанаас болох нь хэний ч анхаарлыг татахаар байв. Тиймээс иргэд Л.Оюун-Эрдэнийг орлогоо нотлохоос гадна огцрохыг шаардаж, "Огцрох амархан" жагсаалыг эхлүүлсэн билээ.

Гэтэл орлогоо ч нотолсон зүйлгүй бараг л сар болох нь. Улмаар Ерөнхий сайд Л.Оюун-Эрдэнэ "Монгол Улсын Ерөнхий сайдад итгэл хүлээлгэх тухай" тогтоолын төслийг УИХ-д өргөн барьсан. Өнөөдөр асуудал шийдэгдэнэ. 

Түүнд дурдсанаар “Хурдтай хөгжлийн төлөөх Зориг уриан доор хэрэгжүүлж байгаа Монгол Улсын Засгийн газрын 2024-2028 оны үйл ажиллагааны хөтөлбөрт туссан Үндэсний баялгийн сан, хөгжлийн 14 мега төсөл, эрчим хүчний салбарын реформ, бүсчилсэн хөгжил зэрэг томоохон зорилтуудын хэрэгжилтийг эрчимжүүлж, бодит үр дүнг бататгах, цаашид дэвшүүлсэн бодлого, зорилтоо хамтын хариуцлагын зарчимд тулгуурлан тогтвортой хэрэгжүүлэх шаардлагыг харгалзан хамтарсан Засгийн газрын бодлогыг дэмжиж, Монгол Улсын Ерөнхий сайд Л.Оюун-Эрдэнэд итгэл хүлээлгэхээр тогтсугай" гэсэн байна. 

Бас нэг зүйл дурдахгүй өнгөрч болохгүй нь. Ерөнхий сайд Л.Оюун-Эрдэнэ УИХ-ын гишүүн байхдаа буюу зургаан жилийн өмнө Defacto Д.Жаргалсайханы асуултад "Ерөнхийлөгч өөрөө Засгийг бүрдүүлдэг байя эсвэл Ерөнхий сайд нь хүчтэй байя, сонгодог парламентын тогтолцоотой байя. Ерөнхий сайд нь хүчтэй байдаг, парламентаа тараадаг, Засгийн газар унахааргүй хэмжээнд эрх мэдлийг Ерөнхий сайдад өгье. Тэгэхгүй бол би судалгаа хийж үзэхэд Монгол Улс хэнээс хамаарах вэ гэвэл 50 хувь Ерөнхийлөгчөөс, 50 хувь Ерөнхий сайдаас гэж. Манайд бол системийн доголдол байна гэж би үзээд байгаа юм. Энэ системийг ашигладаг увиагүй лидерүүд бий" гэж ярьж байжээ. 

Манай улсын улстөрчид гадны жишээ татах дуртай. Тэгсэн мөртлөө гадны улс төрийнхөн шиг хариуцлага хүлээж чаддаггүй. Үүний тод жишээ нь Ерөнхий сайд Л.Оюун-Эрдэнэ болж байна. Гишүүн байхдаа улс төрийн ёс зүйн хариуцлагын асуудал монголд алсарсныг гайхаад л явдаг байж. Өнөөдөр Ерөнхий сайдаас огцорсон ч орлогоо нотлох хэрэгтэй.

Энгийн иргэд НДШ-ийн лавлагаагаа татаад л, дансны хуулгаа харуулаад л орлогоо нотолчихно. Харин Ерөнхий сайдынх яагаад одоог хүртэл нотлогдохгүй байна вэ.

А.Сүх