МАХН-ын дарга Н.Энхбаярыг хэлмэгдүүлж байна гэж үзэн Шинэчлэлийн Засгийн газарт багтсан МАХН-ын гишүүд засгаас гарахаар шийдсэн. Тэгвэл энэ шийдвэрийг баталж МАХН-ын дэд дарга, шадар сайд Д.Тэрбишдагва мэдэгдэл хийлээ. Тэрбээр МАХН Засгийн газраас гарч байгаа шалтгаан нь нэгдүгээрт иргэдийн сонгох, сонгох эрх чөлөөг дээдэлсэнтэй холбоотой гэв. Учир нь саяхан болсон Орон нутгийн сонгуулийн үеэр МАХН-ын нэр дэвшигчдийг олноор нь бүртгэхгүй гэж сонгогдох эрхийг нь хассан мөн бүртгэсэн ч "мартсан" гэсэн шалтгаанаар нэрийг нь саналын хуудсанд хэвлээгүй зэрэг ялгаварлан гадуурхсан үйлдэл олон гарсан гэлээ. Тэрбээр "УИХ-ын сонгуулийн үеэр ч МАХН-ын дарга Н.Энхбаяр, гавьяат З.Ойдов, академич С.Нарангэрэл нарыг нэр дэвшүүлэхээс татгалзаж байсан. Энэ нь туршлагатай, өндөр боловсролтой боловсон хүчинг албаар шахан зайлуулах ажил байсан гэж үзэж байна. Сонгох, сонгогдох эрх гэдэг бол үндэсний эрх ашиг. Тиймээс бид хувь хүн, намын эрх ашгийг хойш тавьж байна. Өнөөдөр МҮАН-тай Засгийн газраас гарах талаар ярьж байна" гэв. "Шударга ёс" эвслийн УИХ дахь бүлгийн дарга Н.Батцэрэг, МАХН-ын дэд дарга Д.Тэрбишдагва нар маргааш хамтран мэдээлэл өгч, байр сууриа илэрхийлэхээр болжээ.

   Тэрбээр "Хэрэв улс төрийн ямар нэгэн тогтворгүй байдал үүсвэл хариуцлагыг МАХН-МҮАН-ын "Шударга ёс" эвсэл үүрэхгүй. Ерөнхий сайд Н.Алтанхуяг, ИЗНН-ын дарга С.Оюун нар өнөөдөр гадаадад ажиллаж байна. Н.Алтанхуяг сайдыг маргааш ирэхэд нь албан ёсоор энэ асуудлыг тавина" гэв.