Ганц хүний ужид хүсэл, оройгүй шуналаас болж нийгэмд эргэлзээ үүсч, төр тогтворгүйтэх шинжтэй. Улс төрийн нам гэдэг цөөнгүй хүмүүсийн үзэл санааны нэгдэл болохоос бус нэгэн гэр бүлийн амьжиргаа, оршихуйг залгуулах хэрэгсэл биш. Гэвч гуравдагч хэмээн өөрийгөө нэрлэсэн Н.Энхбаярын Дээд шүүхэд давж заалдсан зарга зальхайгаас болоод санаанд оромгүй олон зүйлүүд урган гарч байна.

  Ганц хүний ужид хүсэл, оройгүй шуналаас болж нийгэмд эргэлзээ үүсч, төр тогтворгүйтэх шинжтэй. Улс төрийн нам гэдэг цөөнгүй хүмүүсийн үзэл санааны нэгдэл болохоос бус нэгэн гэр бүлийн амьжиргаа, оршихуйг залгуулах хэрэгсэл биш. Гэвч гуравдагч хэмээн өөрийгөө нэрлэсэн Н.Энхбаярын Дээд шүүхэд давж заалдсан зарга зальхайгаас болоод санаанд оромгүй олон зүйлүүд урган гарч байна. Чин үнэндээ хэдэн тэрбум доллар идсэн Н.Энхбаярын сонссон ял, илэрсэн гэмт хэрэг нь даанч хөгийн.

  Байгаль нуурын эрэг дээрх ээжийнх нь амралтын газар, эцгийнх нь өмчилсөн рашаан сувиллууд, Бээжин, Лондон, Москва дахь үнэт байрууд, Америкт дүнхийх гурван ч хаус, энд тэндээс оргилох олон зуун тэрбум, Сэлмэн барилгад оруулсан гэх 20 шахам сая ам.долларын хэрэг нь илрээгүй л байгаа шүү дээ. Түүгээр ч үл барам Хонгконг, Сингапурын банкуудад их хэмжээний мөнгө угаасан тухай гадаадын хэвлэлүүдэд олонтаа бичигдлээ.

  Энэ их мөнгө хаана, хэний нэр дээр байна вэ? Н.Энхбаярт хэрэг үүсгэхтэй зэрэгцээд Сингапурт Монголын далайн тээврийг хариуцаж байсан дүү Н.Энхтуяа нь оргон зайлсан байдаг. Гэмтэй хүн л өөрийг нь оролдоогүй байхад зүс буруулан алга болно. Гэмгүй хүн бол хэнэг ч үгүй ажлаа хийгээд л ахдаа санаа зовсон шигээ аж төрөх байлаа.

    Н.Энхтуяа гэж хэн бэ? Н.Энхбаярын төрсөн дүү гэдгээс өөр ямар ч мэдээлэл байдаггүй. Нөгөө айхтар Интерполь нь ч хайгаад олохгүй байна. Н.Энхтуяагийн нэр дээр ямартаа ч Москва, Бээжинд хэдэн тэрбумын үнэтэй харшууд бий. Монголын далайн тээврийг хариуцан Сингапурт олон жил амьдарсан. Хэмжээгүй эрхт эзэн хаан шиг авирлаж байсан Н.Энхбаярын дүү Сингапурт далайн тээврийг сонирхох болсон нь учиртай. Өнөөдөр гадаад их далайд Монголын төрийн далбааг намируулсан 335 хөлөг онгоц хөвж явна.

 Үүнээс төсөвт ордог мөнгө шал хөгийн, шалихгүй юм байдаг. Тэгвэл ашиг нь хаана байна вэ? Үнэн хэрэгтээ өөрийнхөө далбааг намируулах боломжгүй хар бизнес эрхэлдэг голдуу хууль бус этгээдүүд л бусдын далбааг зээлддэг гэнэ. Тэгэхээр нэг далбааг хэдээр зардаг нь таавар хэвээр үлдэж байна. 20 дугаар зууны дунд үед байна уу даа, хатагтай Вонг хэмээх далайн дээрэмчин эмэгтэй дэлхийг чичрүүлж байлаа. Хууль хяналтынхан түүнийг эрээд эрээд олоогүй гэдэг. Хатагтай Вонгийн тухай олон ч кино хийгдсэн.

  Тэгвэл Монголын “хатагтай Вонг” Н.Энхтуяа болж таарч байна. Мэдээж тэр өрөөсөн нүдээ хар даавуугаар боон далайд гарч дээрэм хийсэнгүй. Харин хууль бус этгээдүүдэд төрийнхөө далбааг зарж, ахынхаа гулгуулсан бохир мөнгийг угаасан шигээ ажин түжин аж төрж байлаа. Өнөөдөр тэр хатагтай Вонгийн замаар орж,  яг л далайн дээрэмчин шиг нуугдаж явна. Н.Энхбаярын зараалаар Хууль зүйн дэд сайд болсон Эрдэнэжамъян гэгч хөвгүүн ажлаа авуутаа л хатагтай Н.Энхтуяа, ял завшин Америкт орогнож буй Т.Билэгт нарыг эрэн сурвалжлах ажлаа зогсоохыг Интерполиос хүсээд буруудсан.

  Тэгэхлээр Н.Энхтуяа гэдэг хүнд маш том нууц байгаа нь ойлгомжтой. Өөрөөр хэлбэл Н.Энхбаярын хулгайлсан мөнгөний авдар нь дүү Н.Энхтуяа нь болж таарч байна. Түүнээс биш буруу зөрүү хэрэг хийгээгүй бол бүсгүй хүн эх орон, элгэн саднаасаа нүүр буруулан оргож бусгаж амьдарна гэж үү? Зарим эх сурвалжийн мэдээлж байгаагаар Н.Энхтуяа баригдаж гэмээн Н.Энхбаярын хэрэг хэдэн арван тэрбум доллараар нэмэгдэх аж. 2009 оны Ерөнхийлөгчийн сонгуулийн үеэр Сүрэнхорын захидал гэгчид Н.Энхбаярын 1,5 тэрбум долларын хадгаламжийн асуудал яригдаж байсан. Эх сурвалжийн мэдээлж байгаагаар уг мөнгө Н.Энхтуяагийн нэр дээр байршсан тухай яриа юм.

  Тэгэхлээр хэргийн учиг Н.Энхтуяа юм биш үү? Үнэхээр ч Н.Энхбаяр хэргээ нэмүүлэхгүйн тулд дүүгээ зугатаалгаж, Интерполиор эрэн сурвалжлахаар нь гар хөл бологсдоороо хууль бус зүйл хийлгүүлж байгаа нь хэргийг улам тодотгож байна. Мэдээж хэрэг буруугүй бол шалгагдаад цагаадна. Зөвхөн гэмт хэрэгтэн л оргож бусгадгийг сануулахад илүүдэхгүй байх. Үүнтэй зэрэгцээд намынх нь нөхөд Н.Энхбаярын хэргийг хэрэгсэхгүй болгож, бүр Улсын Их Хурлын гишүүн болгох шаардлагыг тавьж байна. Инээдтэй гэхээсээ эмгэнэлтэй юм. Харин ч Н.Энхтуяа баригдвал Н.Энхбаярын улсад учруулсан хохирол долоо, наймхан тэрбум төгрөг биш хэдэн арван тэрбум доллар болж хувирна.

  Мань Н.Энхбаяр үүнээс л айгаад байгаа юм. Тиймээс засгаар барьцаалж байгаад Улсын Их Хуралд ороод авбал халдашгүй байдлын тухай хуулиар хэдэн их наяд доллар нэмэгдэж байсан ч айх аюулгүй болно гэдгийг тооцоод байгаа бололтой. Тэгэхлээр Монголын “хатагтай Вонг” болсон Н.Энхтуяаг Интерпол барьж чадвал ард түмнээс хулгайлсан их хэмжээний доллар олдож мэднэ.

                                              Ц.Ганбаяр