Өнгөрч буй долоо хоногт гадаа тэсгим хүйтэн байсан ч улс төрийн амьдрал буцлам халуун байлаа. МАХН-ын дарга Н.Энхбаярын шүүх хурлыг тойрсон шуугиан, Засгийн газар тарах нь гэсэн таамаглал юмны үнэ өссөн, цахилгааны төлбөр нэмэгдэх сургаас илүү олон нийтийн анхааралд байлаа. Өнгөрч буй долоо хоногийн онцлох үйл явдал юу байв?

Онцлох хүн: МАХН-ын дарга Н.Энхбаярын авлигын хэргийг Улсын дээд шүүхээс хянан хэлэлцэж 2.6 жилийн ял оноосон. Н.Энхбаяр энэ долоо хоногт анхаарлын төвд байсан ч түүний хүү Э.Батшугар олныг бүр их гайхуулаад авсан. Анх МАХН-ын парламент дахь нэг суудалд Э.Батшугар очино гэж байсан ч гэв гэнэт Монгол банкны дэд ерөнхийлөгч болсноор энэ асуудал намжсан. Гэтэл СЕХ-ноос Ц.Оюунбаатарын нэрийг УИХ-ын даргад өгчихөөд байхад Э.Батшугар дахин УИХ-д орохоор зүтгэж эхэлсэн тухай мэдээлэв. Монгол банкинд томилогдоод “Албан тушаал бол ажил” гэж хэрсүү хэлж байсан ч сар гаруйхны дараа гишүүн болохоор зэхэж эхэлсэн нь юу харуулна вэ? Монголын төр орж гарах, суудлаа солиход ийм амархан гэж үү?
 
Онцлох томилгоо: Энэ долоо хоногт Монгол улсаас гадаад улсад суух найман элчин сайдыг томилов. Харин энэ дунд өмнөх Засгийн газрын үед Цөмийн энергийн газрын дарга байсан С.Энхбат багтаж, Кувейтийн элчин сайдаар томилогдов. Монголын Засгийн газар цөмийн хаягдал булшлах гэрээ хийх гэж байсан гэж шуугиан дэгдээж, ЭБЭХ-ний сайд асан Д.Зоригтын нэр хүндийг навс унагааж чадсан нэгэн. С.Энхбат Засгийн газрын хуралдаанд удаа дараа дуудахад ирээгүй, хариуцлагагүй хандсан гэж ажлаасаа халагдсан. Тэгвэл МАН-ын гаралтай энэ хүн АН-ын Засгийн үед бүр сайхан ажилд томилогдож, элчин сайд болсон нь олон хүний сонирхлыг татаж байна.

Онцлох мэдэгдэл: Орон нутгийн сонгууль дууссан ч 2013 онд болох  ерөнхийлөгчийн сонгуульд хэн нэр дэвших бол гэсэн асуулт яригдаж эхлээд байна. Намууд ерөнхийлөгчид нэр дэвших боловсон хүчингүй гэцгээж байгаа бол нэгэн бие даагч гишүүнийг ерөнхийлөгчийн сонгуульд нэр дэвших нь гэсэн яриа гараад байлаа. Тэр бол УИХ-ын гишүүн С.Ганбатар. Харин тэрбээр өөрийн амаар энэ яриаг үгүйсгэж “Би ерөнхийлөгчийн сонгуульд  нэр дэвшихгүй гэдгээ нотаритараар батлуулсан ч болно. Энэ дөрвөн жилд би бие даагч гишүүн хэвээрээ байна” гэв.

Онцлох үг: Орон нутгийн сонгууль дуусч АН олонхийн санал авсан. МАН-ын дарга нар харин өнгөрсөн УИХ-ын сонгуулийг бодвол илүү санал авч, ахицтай ажилласан гэж мэдэгдсэн билээ. Тэгвэл энэ долоо хоногт УИХ-ын гишүүн Ж.Энхбаяр МАН-ын гишүүдээс анх удаа ялагдлаа хүлээн зөвшөөрөв. Ж.Энхбаяр гишүүний онцлох үг: “МАН ард түмнээсээ уучлалт гуйх ёстой. Монголчуудаа уучлаарай, бид та нарынхаа итгэлийг алдлаа гэж”.

Онцлох залбирал: Улсын дээд шүүхийн өмнө нэгэн эмээ нүдээ анин сүү өргөхдөө дотроо ихэд хичээн залбирч байна. Харин тэрбээр үр хүүхэд, өөрийнхөө төлөө биш МАХН-ын дарга Н.Энхбаярын хэргийг шүүгчид хэрэгсэхгүй болгоосой хэмээн залбирч байсан юм. Эмээ, өвөө нар голдуу МАХН-ын дэмжигчид Улсын дээд шүүх рүү орох гэж дайрч цагдаа нарыг сандаргаад авсан.

Онцлох гоёл: МАХН-ын дарга Н.Энхбаярын шүүх хурал болсон Улсын дээд шүүхийн гадаа эмээ, өвөө нарын хамт УИХ-ын гишүүн З.Баянсэлэнгэ ирсэн байлаа. Тэрбээр ганган хар шуб, үстэй малгайгаараа жагсагчдаас сондгойрч байв. УИХ-ын гишүүн болохоососс өмнө тэрбээр иймэрхүү жагсаалд ноосон малгайтайгаа оройлон оролцдог байсан билээ.

Долоо хоногийн хүлээлт: УИХ-ын гишүүний тангаргаа өргөхөөр хүлээж байгаа таван эрхмийг хэзээ чуулганы танхимд орж ирэх бол гэсэн хүлээлт 7 хоногийн турш үргэлжиллээ. Д.Сарангэрэл, Д.Арвин, Г.Батхүү, Д.Зоригт, Ц.Оюунбаатар нар гоёлын дээлээ зэхэж тэсэн ядан байгаа ч бусад улс төрчдийн асуудлаас болж хойшлогдсоор. Г.Батхүү, Д.Зоригт нарыг тангараг өргөхийг МАН-ынхан эсэргүүцсээр байгаа бөгөөд Ц.Оюунбаатар ч яах нь тодорхойгүй байсаар. Дээр нь МАХН Засгийн газраас гарна гэж мэдэгдсэнээс болж тэдний шинэ гишүүний тэмдгээ зүүх өдөр хойшлогдсон. Ирэх долоо хоногт ч тэдний хүлээлт үргэлжилж магадгүй. Учир нь улс төрчдийн тохироо дуусаагүй байна. 
                                                                                                                                                                    24tsag.mn