“ТV9” телевизийн 40 гаран ажилчин нэгэн зэрэг ажлаасаа гарсан талаарх мэдээлэл хэвлэлүүдээр гараад байгаа билээ. Ажлаасаа гарсан 40 ажилтан өнөөдөр мэдээлэл хийлээ. Одоогийн байдлаар TV9 телевизийн мэдээний алба, спортын алба бүрэн бүрэлдэхүүнээрээ, зураглаачдын албаны 80 хувь нь ажлаасаа гарсан байгаа юм байна. “TV9” телевиз нь байгуулагдаад 9 жил болж байгаа бөгөөд сүүлийн 8 жилд нь Ц.Энхбат гэдэг хүн удирдсан. Ц.Энхбатыг ажлаа өгсний дараа тус телевизийн кино албаны дарга байсан Н.Долгорыг түр орлон гүйцэтгэгч захирлаар томилжээ. "ТV9" телевизийн ажилчдын хэлж буйгаар Н.Долгор нь дарга болонгуутаа араваад уран бүтээлчийг ор үндэсгүйгээр ажлаас нь халж, үлдсэн уран бүтээлчдийг нь шахаж дарамталсан аж. Иймд тус телевизийн 60 гаран уран бүтээлч нэгдэн Н.Долгорыг өөрчлөх хүсэлтийг телевизийнхээ төлөөлөн удирдах зөвлөлд хүргүүлсэн байна. Гэвч ТУЗ Н.Долгорыг өөрчлөхгүй гэсэн шийдвэр гаргасан. Тиймээс үүрэг гүйцэтгэгч байх хоёр сарын хугацаанд Н.Долгортой цаашид хамтран ажиллах боломжгүй гэж үзэн 40 уран бүтээлч өргөдлөө өгч ажлаасаа гарчээ.

Одоо эдгээр 40 уран бүтээлч цаашид Монголд хараат бус мэргэжлийн сэтгүүл зүйг хөгжүүлж багаараа хамтарч ажиллахыг хүсч байгаа учраас шинэ ажил хэрэгч байгууллага болон хувь хүмүүстэй хамтран ажиллах болсоноо мэдэгдлээ. Манай сайт хэсэг хугацааны дараа "TV9" телевизийн мэдээний албаны сэтгүүлч байсан Б.Отгоны ярилцлагыг хүргэх болно.