“ТV9” телевизийн 40 гаран ажилчин нэгэн зэрэг ажлаасаа гарсан талаарх мэдээлэл хэвлэлүүдээр гараад байгаа билээ. 24tsag.mn ажил хаясан хүмүүсийн мэдээллийг хүргэсэн билээ. Үүсээд буй нөхцөл байдлын талаар "TV9" телевизийн мэдээний албаны сэтгүүлч байсан Б.Отгонтой ярилцлаа. 

- Үүсээд байгаа нөхцөл байдлын талаар дэлгэрэнгүй яриач?

- Ц.Энхбат захирал “TV9” телевизийг удирдаж байхад тус телевизийг ямар явж байсныг үзэгчид мэдэх байх. Сүүлийн хоёр сарын хугацаанд манай кино албаны дарга байсан Н.Долгор гэдэг хүн захирлын албан тушаалд очсон. Манай 65 уран бүтээлч программын албаны дарга Баярсайхан, маркетингийн албаны дарга Ариунболд, Н.Долгор гэсэн гурван хүнийг ажлаас нь чөлөөлж өгнө үү гэсэн хүсэлтийг  ТУЗ-д тавьсан байгаа. Ямар нэгэн хүсэлт шаардлага тавихад үндэслэл байх ёстой.  Халагдах өргөдлөө 40 гаран уран бүтээлч өгсөн. Хамгийн гол нь энэ хүмүүс хэн нэгний турхиралтаар, хэн нэгний өдөөн хатгалтаар халагдах өргөдөлд гарын үсгээ зураагүй юм.Тус телевизийн уран бүтээлчид эвлэлдэн нэгдсэн гэдгийг албан ёсоор хэлмээр байна. Энэ улс төрийн зорилготой байгаагүй. Энэ Н.Долгор, Баярсайхан, Ариунболд гэдэг хүмүүс уран бүтээлчдийн эрхэнд хэтэрхий их халдаж байна. Ажлаа хийгээд явж байхад хааж, боож байна. Хов живээр асуудалд хандаж байна. Дээрээс нь нэвтрүүлгүүдийг үгүй хийж байна. Бидэнтэй хамтарч ажиллаж байсан 10 гаруй уран бүтээлчийг ээлж дараалан халсан зэрэг асуудлаас болж бид энэ хүсэлтийг тавьсан юм. ТУЗ-д хүсэлтээ өгсөн. ТУЗ энэ гурван хүнийг ажлаас нь чөлөөлөх боломжгүй гэж хэлсэн. Биднийг санал сэтгэгдлээ хурал дээр хэл гэсэн. Биднээс нэг ч хүн үлдэлгүй энэ гурван хүний талаар санал сэтгэгдлээ хэлсэн. Энэ сарын 5-ний өдөр 5 хүнийг ажлаас нь чөлөөлөх тушаал гаргасан байсан. Тэр таван хүнийг ажлын байран дээр хурал цуглаан зохион байгуулсан болоод “TV9”-ийн нэр хүндэд халдсан гэх үндэслэлээр халсан байсан. 12 сарын 6-нд саналаараа өргөдлөө өгсөн хүмүүсийг ажлаас нь чөлөөлсөн тушаалыг ээлж дараалан гаргасан. Нэг өдрийн дотор 28 хүний тушаалыг гаргасан.

Н.Долгор захирлын зүгээс  шахалт дарамт ирдэг байсан гэж байна. Яг ямар шахалт, дарамт ирдэг байсан юм бэ?

 Хоёр жишээ хэлье. Программын албаны дарга Баярсайханд янз бүрийн хараал зүхлээр дуудуулж, дарамтуулж байгаагүй хүн энд нэг ч байхгүй. Тэр хүн ажилчидтайгаа харьцахдаа “Та нар Н.Энхбаярын угаадсыг идэж байгаа” гэж хэлдэг. Н.Энхбаяр гэдэг хүн тэгэж хэлээгүй байхад тэр хүн тэгэж хэлдэг. Энэ доромжлолыг амссан хүмүүс яаж ажиллах вэ?. Тэр хүнийг эсэргүүцэхгүй байхын аргагүй биз дээ. Энэ бол өдөр тутмын ажилд гардаг асуудал. Н.Долгор гэдэг хүн захирлын ажлыг аваад гурван удаа өрөөгөө сольсон. За яахав захирал хүн өрөөгөө солино уу бидэнд хамаагүй байж болно. Гэхдээ “TV9” телевизийн уран бүтээлчид хоолоо иддэг өрөөг авчихсан юм. Бидэнд ерөөсөө хоолны цаг гэж байдаггүй. Бид хоолоо авчирч иддэг. Хоолныхоо цагаар амсхийдэг. Мөн Н.Долгор гэдэг хүн уран сайхны зөвлөлийн дарга гэж явдаг. Уран сайхны зөвлөл гэдэг зүйл байгуулагдсанаар нэвтрүүлгүүдийг нэг нэгээр нь үгүй хийсэн. Уран сайхны зөвлөлөөр ороод л “Энэ ерөөсөө болохгүй юм байна” гэж хэлдэг. Яагаад болохгүй байгаа шалтгаан, яагаад сайжрах шалтгаан гэдэг зүйлийг бидэнд  хэлэхгүй байж байгаад нэвтрүүлгийг нь сүлжээнээс авдаг. Тэгэнгүүт сэтгүүлч долоо хоногийн дотор өөр нэвтрүүлгийн санаа шийдэл, эрэл хайгуул хийдэг. Ингээд явж байхад тайлан нэхдэг. Тайлан нэхчихээд хоёр сарын чөлөө өгье энэ тэр гэсэн зүйлийг ярьдаг. Цалинг нь өгөхгүй. Сайжрах хоёр сарын чөлөө өгнө гэдэг. Тэр хүн юуг муу хийсэн гэдгээ мэдэх эрхтэй биз дээ. Энэ бол та бүгдэд хэлж болох жишээ юм. “ТV9” телевиз Монголын газар нутгийн халуун цэг дээр очиж ажилладаг байсан. Өмнөговийн нүүрсний зам, Сэлэнгийн алтны ордууд гээд олон газар очиж ажиллаж байсан. Хамгийн сүүлийн жишээ гэхэд манай сэтгүүлч Бүжинлхам Өмнөговьд гэр бүлээрээ машинд дайруулж амь насаа алдсан хэргийн газар руу яваад сурвалжлага бэлдэе гэхэд тэр томилолтыг шийдэж өгөлгүй 10 хоносон. Бид цаг хугацаатай уралддаг. Мэдээллийн хамгийн чухал зүйл бол хурд байдаг. Тэгэхээр л эдгээр хүмүүсийн сэтгүүл зүйг ойлгохгүй гэдэг нь харагдаж байгаа юм.
Бид нар сэтгүүлч хүмүүс. Сэтгүүлчид өнөөдөр сэтгүүл зүйн зарчмыг баримталж шудрага үнэний дуу хоолой болж ажиллах ёстой. Энэ зарчимаа бид өнөөдрийг хүртэл хангалттай биелүүлж ирсэн гэж үздэг. “ТV9” өнөөдөр Монгол улсын газар нутгийн бүрэн бүтэн байдал, эгэл ардын эрх ашгийн төлөө ажиллаж ирсэн. Үүгээрээ бид бахархдаг. Энэ бол бидний мэргэжлийн нэр хүнд. Харин энэ удирдлагууд томилогдсоноор бид мэргэжлийн эрүүл сэтгүүл зүйн төлөө ажиллах боломжгүй болсон. Ийм учраас бид сэтгүүлчдийн хувьд уран бүтээлчдийн хувьд энэ байдалтай эвлэрч чадахгүй гэдэг үүднээс энэ шийдлийг хийсэн.

 Н.Энхбаярын эхнэр Цолмон таныг дарамталсан гэх яриа байна. Энэ хэр бодитой мэдээлэл вэ?

Тийм зүйл болоогүй. Би ч хүний дарамтад ороод байх хүн биш. Би айх юмнаасаа айлгүй өдий хүрсэн. Би 9 жил ажиллахдаа Монголын газар нутгийн төлөө, үндэсний эрх ашгийн төлөө ямар ч мөнгөтэй хүн, том компаниас айлгүйгээр өнөөдрийг хүрсэн юм. Өнөөдөр ч гэсэн хийж байгаа үйлдэлээ хэн нэгнээс айж хийсэн юм биш.

TV9-ийн телевизийн үйл ажиллагаа Н.Энхбаяр гэдэг хүнтэй үргэлж холбоотой байдаг гэдгийг хүмүүс мэднэ. Телевизийн бодлогод чинь тэр хүний нөлөөлөл байдаг уу. Нийтлэлийн бодлогоо тэнцвэртэй хүргэж чадсан уу?

Тэр хүний шууд болон шууд бус  нөлөөлөл Спорт болон нэвтрүүлгийн албанд байгаагүй. Яг үнэндээ Монголын хэвлэл мэдээлэл эздийн хараат байгаа. Хараат бус, мэргэжлийн сэтгүүл зүй хараахан Монголд төлөвшөөгүй байна. МАХН-ын дуу хоолой боллоо гэсэн шүүмжлэл бидэнд ирдэг байсан. Гэхдээ бид сэтгүүлчийнхээ хувьд нэг намын эрх ашигт үйлчлээгүй ирсэн гэдгийг баттай хэлнэ. Бид намын эрх ашгаас илүү, нийтийн эрх ашиг, үндэсний эрх ашгийг дээгүүрт тавьж байсан. Аль ч телевиз адилхан шүү дээ.

Одоо хаана ажиллах гэж байна вэ?

Бид ажлаасаа гарчихлаа одоо яах вэ гэж санаа зовохгүй байна. Телевизэд хамгийн үнэтэй зүйл хүн байдаг. Техник, тоног төхөөрөмж, хөрөнгө санхүүгийн асуудал хоёрдугаарт орно. Есөн жил ажиллачихсан, туршлагатай сэтгэл нийлсэн, хаанаас юуг ч, яаж ч хийж чадахаар уран бүтээлчид байгаа учраас бид өөрсдөдөө найдаж байна. Тийм учраас бид нар сэтгүүл зүйгээсээ буцахгүй. Энэ давуу талаа ашиглан бид Монгол үндэсний язгуур эрх ашиг, шудрага үнэний дуу хоолой болсон шинэ телевизийг босгохын төлөө зорьсон ажил хэрэгч байгууллага хүмүүстэй хамтарч ажиллахад бэлэн байна гэдгийг хэлмээр байна.