МАН-ыг “Шударга ёс” эвсэлтэй нэгдэж, бүлэг байгуулах гэж байгаа талаар хэвлэлүүд бичиж эхэлжээ. Уг ажлыг УИХ-ын гишүүн, “Шударга ёс” эвслийн гишүүн О. Баасанхүү хариуцан ажиллаж байгаа.
    МАН-ыг “Шударга ёс” эвсэлтэй нэгдэж, бүлэг байгуулах гэж байгаа талаар хэвлэлүүд бичиж эхэлжээ. Уг ажлыг УИХ-ын гишүүн, “Шударга ёс” эвслийн гишүүн О. Баасанхүү хариуцан ажиллаж байгаа. Энэ талаар өчигдрийн МАХН-ын нарийн бичгийн дарга нарын хуралдаанаар хэлэлцсэн хэмээн эх сурвалж мэдээлсэн юм. Юутай ч МАН, “Шударга ёс” эвсэлтэй нэгдэж, томоохон бүлэг байгуулахаар зэхэж эхэллээ.

    Учир нь АН-ынхан МАН-ын бүлэг байгуулах асуудлыг хавчсаар байгаа. Өнгөрсөн долоо хоногт МАН-ын бүлэг байгуулах асуудлыг хэлэлцэх үеэр АН завсарлага авсан. Мөн Өвөрхангайн аравдугаар тойргоос АН-аас нэр дэвшиж, УИХ-ын гишүүний тангараг өргөх болсон Д.Зоригт, Г.Батхүү  нараар барьцаалж байгаа. Учир нь Г.Батхүү, Д.Зоригт нарыг тангараг өргүүлэх чуулганы хуралдаанд МАН-ынхан оролцохгүй чуулганыг олонтаа хойшлуулсан. Тиймээс АН-ынхан Д.Зоригт, Г.Батхүү нарыг тангараг өргүүлбэл МАН-ын бүлгийг байгуулна гэж буй.

    Нэгэнт ийм нөхцөл байдал үүссэн учраас МАН-ынхан өөр нэгэн гарц сонгосон нь “МАХН-МҮАН”-ын “Шударга ёс” эвсэлтэй нэгдэж, бүлэг байгуулахаар болсон хэрэг юм. Учир нь МАН-ын дангаараа бүлэг байгуулах асуудал АН-аас хамааралтай, харин “Шударга ёс” эвсэлтэй нэгдэж бүлэг байгуулвал АН-аас хамаарах зүйл байхгүй учир ийм зам сонгожээ.

    Хэдийгээр МАН, Шударга ёс эвсэлтэй нэгдэж бүлэг байгуулахыг МАН-ын гишүүд болох УИХ-ын гишүүн С.Бямбацогт, Ц.Нямдорж, Д.Оюунхорол, Я.Содбаатар нар эрс үгүйсгэж байгаа ч “Шударга ёс” эвсэлтэй эвсэх нь МАН-д ашигтай тул МАН-ын удирдлагууд бүлэг байгуулахаар яаравчилж байгаа юм байна.

      Одоогоор зөвхөн бүлэг байгуулах асуудал яригдаж байгаа. Гэвч энэ нь МАН, МАХН-ын хоёрын нэгдэх эхлэл ч байж болох юм. Учир нь МАН УИХ-ын сонгуульд цөөнх болсон цагаас МАН, МАХН-тай нэгдэнэ гэх яриа чих дэлсэж байсан. Харин бүлэг байгуулж буй асуудал нь хоёр намын нэгдлийн эхлэл ч байж болох юм.