Улаанбаатараас Дархан хот орох замд байрладаг “Урьхан” зоогийн газар шатаж буй бичлэг тарж, нийтийн анхаарлыг татаад байгаа билээ. Арван дөрвөн жил Дархан хотыг зорьсон аянчдыг хооллож, ундаалж байсан энэ газар хоёр цагийн дотор юу ч үгүй шатсан шалтгааныг цөөнгүй хүн сонирхож байна. Галын шалтгааныг албаныхан шалгаж, хоёр хүнийг буруутай гэж үзэн баривчилжээ. Цагдаагийнхан тэднийг “Урьхан” зоогийн газрыг өшөө авах зорилгоор шатаасан байх магадлалтай гэж цагдаагийнхан сэжиглэж байгаа аж.

    Энэ зоогийн газрыг ажиллуулдаг эзний хүү Ч.Ганжавхлан гэж хүний эрхийн төлөө тэмцдэг, бусдыг сайн үйлсэд уриалдаг залуу бий. Хамгийн сүүлд гэхэд хойд эцэгтээ зодуулсан долоон настай хүүгийн эрхийг хамгаалахаар УИХ-ын гишүүн Ж.Батзандантай хамт хүүг эргэж очсон билээ. Тэрбээр өмнө нь энэ мэт олон хэргийн хойноос хөөцөлдөж, мөн л хүний эрхийн төлөө тэмцэгч Ц.Ганзоригийн амь насаа алдсан явдлыг үнэн зөвөөр шийдүүлэхээр зүтгэж байгаа юм. Тиймээс хууль бус үйлдэл хийдэг хүмүүстэй тэмцдэг хүүд нь өширхөж аавынх нь ажиллуулдаг зоогийн газрыг шатаасан байх магадлалтай гэж сэжиглэсэн байна. Гэхдээ цагдаагийнхан хоёр сэжигтнийг баривчилсан ч “Урьхан”-ы эзэн гомдолгүй хэмээн тэднийг суллаж явуулахыг хүсчээ.

     Ч.Ганжавхлан болон түүний гэр бүлийнхэн энэ талаар мэдээлэхийг хүсэхгүй байгаа ч зарим эх сурвалж "Урьхан" шатсан нь түүний мөрдөж, хөөж байгаа хүний эрхийн хэрэгтэй холбоотой гэж үзэж байна. Сүүлийн жилүүдэд Монголд хүний наймааны асуудал хурцдаж, Монгол улс хүний наймааг нийлүүлэгч, дамжуулагч орон болж хувираад байгаа. Тэгвэл үүний эсрэг тэмцэж байгаа хүмүүстээ анхаарал хандуулж, дуу хоолойг нь сонсох цаг болсныг энэ явдал харуулаад байх шиг.