Монголын Үндэсний музей XVII жарны “Сүрээр дарагч” хэмээх гал морин жилийн сар шинийн баярыг угтан музейн сан хөмрөгийн цуглуулга, мөн “Мандала бурхан шашны төв”-ийн тэргүүн, “Монгол Их цам” төслийн удирдагч, Монгол Улсын Соёлын гавьяат зүтгэлтэн Сэнгэбазарын Батбаярын хувийн цуглуулгаас дээжлэн бүрдүүлсэн, монголчуудын адууны соёлын бэлгэдэл, морин шүтээнийг цогцоор нь харуулсан “Өнө мөнхийн молор эрдэнэ” тусгай үзэсгэлэнг олны хүртээл болголоо.

“Энэхүү үзэсгэлэн нь монголчуудын адуутай холбоотой шүтлэгийн уламжлал, бэлгэдлийн сэтгэлгээг хойч үед өвлүүлэн үлдээх, танин мэдүүлэхэд чухал ач холбогдолтой” хэмээн Монгол Улсын Соёлын гавьяат зүтгэлтэн С.Батбаяр онцоллоо. Тус үзэсгэлэнд VIII Богд Жавзандамба хутагтын Их могой сахиус болон адуун соёлтой холбогдох бурхан шүтээн, шашны эд хэрэглэл, монгол зураг, баримал зэрэг урлагийн ховор нандин бүтээлүүд, адуу малын тоног хэрэгсэл зэрэг 200 гаруй үзмэрийг харах боломжтой.

Мөн тусгай үзэсгэлэнгийн хүрээнд нэрт хүлэгч С.Ононмөрийн мэндэлсний 160 жилийн ойд зориулсан, урьд өмнө олон нийтэд дэлгэгдэж байгаагүй ховор эд өлгийн зүйлсийг дэлгэн, монгол уяачийн өв уламжлал, морь шинжих ухаан, хүлэгтэй холбогдох уламжлалт мэдлэг, соёлын өвийг олон нийтэд танилцуулж байгаагаар онцлогтой. Тус үзэсгэлэн 2026 оны гуравдугаар сарын 01-ний өдөр хүртэл музейн цагийн хуваарийн дагуу ажиллана.

Тус үзэсгэлэнгийн нэгэн онцлог нь Төрийн шагналт яруу найрагч Ренчингийн Чойномын 90 жилийн ойд зориулсан тусгай буланг байршуулсан явдал байв.

Буланд яруу найрагчийн зурсан Д.Сүхбаатар жанжны зургийг залжээ. Сонирхуулахад, их зохиолч дүрслэх урлагийн сургуульд суралцаагүй атлаа маш чадварлаг барималч, авьяаслаг зураач байсан гэдэг.

Л.Баяр