Энэ оны хоёрдугаар сарын эхээр Аргентины далайн гүнээс судлаачид шинэ амьд биетүүдийг илрүүлжээ. Тэдний дунд Stygiomedusa gigantea буюу асар том гүний усны медуза багтаж байна. Судлаачдын тэмдэглэснээр энэ медуза нь ойролцоогоор сургуулийн автобусны урттай буюу 11 метр хүртэл хэмжээтэй бөгөөд ийм хэмжээтэй далайн медузаг харах үзэгдэл нь тун ховор гэнэ.
Энэхүү судалгааг CONICET (Аргентин улсын шинжлэх ухааны үндэсний зөвлөл) болон Буэнос-Айресын их сургууль удирдан гүйцэтгэсэн бөгөөд гүн далайн олон төрөл зүйлийн амьтад илэрсэн байна. Тухайлбал, 28 шинэ төрөл тодорхойлогдсон нь дэлхийн гүн усны экосистемийн баялаг, олон янз байдлыг харуулж байгаа томоохон ололт болжээ.
Судлаачдын тайлбарласнаар энэхүү медуза нь урт дөрвөн тэмтрүүлтэй, усны гүнд хөдөлгөөнгүй маягаар оршдог ч планктон болон жижиг загасыг барьж иддэг аж.
Энэ нээлт нь далайн гүн усны амьдралын хэв маяг, хооллолт хэр олон янз байдгийг харуулсан сонирхолтой, шинжлэх ухааны ач холбогдолтой ололт болоод байна.
