Apple компани жил бүр зохион байгуулдаг хөгжүүлэгчдийн бага хурал болох "WWDC 2026"-г зургаадугаар сарын 8-нд эхлүүлж, хиймэл оюун ухаанд суурилсан шинэ үеийн Siri AI туслах, үйлдлийн системүүдийн шинэчлэл болон хүүхдийн хэрэглээний аюулгүй байдлын шинэ боломжуудыг танилцууллаа. Энэ нь мөн Apple-ийн гүйцэтгэх захирал Тим Күүкийн удирдсан сүүлчийн WWDC болж байгаа юм. Тэрбээр энэ намар албан тушаалаа өгч, оронд нь Жон Тернус томилогдохоор болсон байна.

Хурлын гол онцлох мэдээ нь шинэчлэгдсэн Siri AI байлаа. Apple-ийн мэдээлснээр Siri нь өмнөх хувилбараасаа илүү ярианы хэлбэртэй, хэрэглэгчийн нөхцөл байдлыг ойлгодог, олон үйлдлийг нэгэн зэрэг гүйцэтгэх чадвартай болсон байна. Тус систем нь Apple-ийн өөрийн "Apple Intelligence" технологийг ашиглахын зэрэгцээ Google-ийн Gemini хиймэл оюун ухааны загвартай хамтран ажиллах аж.

Шинэ Siri AI нь аяллын төлөвлөгөө гаргах, бичвэр засварлах, зураг боловсруулах зэрэг илүү төвөгтэй ажлуудыг гүйцэтгэх боломжтой болсон бөгөөд энэ намраас хэрэглэгчдэд хүрэхээр төлөвлөгджээ. Apple ийнхүү OpenAI-ийн ChatGPT, Google Gemini зэрэг өрсөлдөгчдөөс хоцорсон байр сууриа нөхөхийг зорьж байна.

Мөн Apple хүүхдийн хэрэглээний аюулгүй байдлыг сайжруулах шинэ боломжуудыг танилцуулсан байна. Үүнд эцэг эхийн хяналтын өргөтгөсөн тохиргоо, контент шүүх систем, дэлгэц ашиглалтын ил тод тайлан, Safari хөтөчийн зөвшөөрлийн шинэ механизм багтаж байгаа аж.

WWDC 2026 нь зөвхөн технологийн шинэчлэл төдийгүй Apple-ийн удирдлагын шинэ үе эхэлж буйг илтгэсэн онцгой арга хэмжээ боллоо. 2011 оноос хойш Apple-ийг удирдсан Тим Күүк тайзан дээр гарч ирэхэд үзэгчид босон алга ташин хүндэтгэл үзүүлсэн бөгөөд түүний 15 жилийн удирдлагын замнал ийнхүү өндөрлөж байна.

Л.Баяр