Төрийн албан хаагчдын ажил 08:00 цагаас эхэлдэг болсоор багагүй хугацаа өнгөрчээ. УИХ-ын гишүүд энэ журмыг мөрдөх гэж үйлээ үзэж байх шиг. Тэдний хувьд өвлийн хүйтэн, өглөөний харанхуйд нойроо хугаслан ажилдаа очих нь хүндрэлтэй байгаа аж. Долоо хоногийн мягмар, лхагва гарагт байнгын хороодын хуралдаан 08.30 цагаас эхлэхээр зарлагддаг. Харамсалтай нь, гишүүдийн нойрноос болоод хуралдаан цагтаа эхэлсэн удаагүй ажээ.

Тэд 09:00 цаг өнгөрч байхад хуралдааны танхимд орж  ирэнгүүтээ “Замын түгжрэл, харанхуйгаас болоод хоцорчихлоо” хэмээн цэцэрлэгийн хүүхдээс долоон дор шалтаг хэлж суух нь олонтаа. Уг нь цэцэрлэг, сургуулийн бяцхан жаалууд 08:00 цагт “албандаа” явж чаддаг. Гэтэл төрийн унаа, хувийн жолоочтой эрхэм гишүүд дээрх шалтгийг хэлээд сууж байх ч гэж дээ гэх бодол эрхгүй төрнө.