"МУИС-Ротаракт" клубээс энэ оны 10 сарын 28-ны өдрөөс эхлэн Нийслэлийн Засаг даргын Тамгын газрын дэргэдэх Хүүхэд асран хамгаалах тусгай төвийн хүүхдүүдэд “Хүүхэд бол аз жаргалын цэцэг” төслийг хэрэгжүүлж байгаа билээ.

  

    "МУИС-Ротаракт" клубээс энэ оны 10 сарын 28-ны өдрөөс эхлэн Нийслэлийн Засаг даргын Тамгын газрын дэргэдэх Хүүхэд асран хамгаалах тусгай төвийн хүүхдүүдэд “Хүүхэд бол аз жаргалын цэцэг” төслийг хэрэгжүүлж байгаа билээ.

    Төслийн хүрээнд асрамжийн газрын хүүхдүүдэд англи хэл, илтгэх урлаг, кунг-фу-гийн сургалтуудыг хагас жилийн хугацаанд зааж сургах байгаа юм. Монголын ирээдүй болсон хүүхэд багачуудад оюуны хөрөнгө оруулахад энэ төслийн зорилго оршиж байгаа юм. Энэхүү төслийг хэрэгжүүлэгчид энэ сарын 23-ны өдөр Хүүхэд асран хамгаалах тусгай төвийн хүүхдүүдийн шинэ жилийн баярыг тэмдэглэж бэлэг өгсөн байна.

    “Саруул сайхан гэрэлт ирээдүй” сан шинэ жилийн бэлгийг санхүүжүүлж, 10 сая төгрөгөөр ивээн тэтгэсэн аж.  Мөн Ж.Энхтуяа захиралтай “Грийн Сити” ХХК өөрийн бүтээгдэхүүний дээжээсээ хүүхдүүдэд бэлэглэсэн бол Үүрэн холбооны анхны компани болох “Мобиком” корпораци Асрамжийн газрын 10 хүүхдэд нэг жилийн турш үнэгүй ярих эрхтэй дугаар бэлэглэж бидний баяр дээр баяр нэмлээ.

Ивээн тэтгэж хамтран ажилласан “Саруул сайхан гэрэлт ирээдүй” сангийн хамт олны өгсөн 10 сая төгрөгөөр 200 хүүхдийн бэлэг буюу нэг бүр нь 50000 төгрөгийн бэлгийг хүүхэд тус бүрд гардуулан өгсөн. Өвлийн хахир хүйтэн цагт хүүхдүүдэд дулаан оймс, бээлий, үндэсний үйлдвэрлэлээ дэмжиж эсгий таавчиг, мэдээж хүүхэд бүрийн дуртай чихэр жимс амттан ч бэлгэнд нь багтсан. Асрамжийн газрын хүүхдүүд МУИС-Ротаракт клубын ах эгч нартаа зориулан бүжиг бүжиглэж, дуу дуулж бэлэг барьсан юм. Гадаа хэдийгээр идэр есийн хүйтэн жавар тачигнаж байгаа ч хүүхэд бүрийн сэтгэл жаргалтай дулаахан байлаа.

    Мөн Нийслэлийн Цагдаагийн газрын дэргэдэх Хүүхдийн хаяг тогтоох төвийн 75 хүүхдийг баярлуулсан. Хаяг тогтоох төвийн хүүхдүүд гэртээ харьдаг ч эргээд л ирдэг гэж захирал багш хэлж байв. Мөн энэ төвийн эмч тэтгэвэртээ гарсан тул эмч хэрэгтэй байгаагаа ч бидэнд дуулгасан. Яагаад хүүхэд гэрээсээ оргож, гудамжинд хэсэж тэнэж байна вэ гэдгийг бодох цаг иржээ. Бяцхан хүүхдүүд хэдий болтол хариуцлагагүй эцэг эхийн буруугаас болж гудамжинд тэнэж, асрамжийн газарт амьдарсаар байх вэ? Төр засгаас хүүхдийн эрхийг хамгаалах, Хүүхэд хамгааллын тал дээр анхаарах цаг хэдийнэ болжээ. МУИС-Ротаракт клуб нийгэмдээ чиглэсэн олон төсөл хэрэгжүүлдэгийн зөвхөн нэг нь энэ. Залуус сэтгэл зүрхээрээ нэгдээд бүх зүйлийг хийж чадна гэдгийг МУИС-Ротаракт клубынхэн үргэлж харуулдаг.