Холливудын алдарт жүжигчин Том Холланд өөрийн тоглосон зарим бүтээлийн талаар урьд өмнө байгаагүй илэн далангүй ярьж, бүх кино нь үзэгчдийн анхаарлыг татахуйц сайн байгаагүй гэдгийг хүлээн зөвшөөрчээ. Тэрбээр "Dish Podcast"-д оролцох үеэрээ кино сурталчлах ажил жүжигчний хувьд заримдаа амаргүй байдаг талаар ярьсан байна. Холландын хэлснээр, өөрийнх нь үнэхээр итгэдэг, бахархдаг киног сурталчлахад хялбар байдаг. Учир нь үзэгчид “Яагаад энэ киног үзэх ёстой вэ?” гэж асуухад чин сэтгэлээсээ хариулж чаддаг аж.

Харин зарим бүтээлийнхээ тухайд тэр ярихдаа, “Заримдаа хүмүүс надаас ‘Яагаад энэ киног үзэх ёстой юм бэ?’ гэж асуухад би дотроо ‘Үнэндээ үзэх хэрэггүй байх, энэ тийм ч сайн кино биш’ гэж бодож байсан үе бий” хэмээн ярьжээ. Гэхдээ тэр яг аль кинонуудаа хэлж байгаагаа тодорхой дурдаагүй байна. Харин түүний өмнөх бүтээлүүдээс шүүмжлэгчид болон үзэгчдийн үнэлгээ харьцангуй сул байсан хэд хэдэн кино бий.

Тухайлбал:

• “The Devil All the Time” (2020) – Жэйк Гилленхол, Роберт Паттинсон зэрэг жүжигчидтэй хамт тоглосон сэтгэлзүйн драм кино. Холланд энэ кинонд Арвин Расселийн дүрийг бүтээсэн ч кино нь үзэгчдэд хүнд, бараан өнгө аястай байсан.

• “Cherry” (2021) – Ах дүү Руссогийн найруулсан энэ кинонд Холланд Иракийн дайнд оролцоод ирсэн, сэтгэлзүйн асуудалтай цэргийн дүр бүтээсэн. Жүжигчний тоглолтыг магтсан ч кино өөрөө ихээхэн шүүмжлэл дагуулсан.

• “Chaos Walking” (2021) – Шинжлэх ухааны уран зөгнөлт энэ кинонд Холланд Дэйви Прентиссийн дүрд тоглосон. Том төсөвтэй байсан ч кино нь шүүмжлэгчдээс тааруу үнэлгээ авч, арилжааны амжилт үзүүлж чадаагүй.

Харин Холландын хамгийн том амжилт авчирсан бүтээлүүд бол Марвелийн “Spider-Man: Homecoming” (2017), “Spider-Man: Far From Home” (2019), “Spider-Man: No Way Home” (2021) кинонууд юм. Тэрбээр эдгээрт Питер Паркер буюу Spider-Man-ийн дүрээр дэлхий даяар танигдсан. Одоо Холланд карьерынхаа шинэ үе шатанд явж байна. Тэрээр Кристофер Ноланы найруулсан “The Odyssey” кинонд Телемахын дүр бүтээж байгаа бол мөн Марвелийн шинэ бүтээл болох “Spider-Man: Brand New Day” кинонд дахин Spider-Man-ийн дүрээ эргэн бүтээж байна.

Холландын хувьд эдгээр шинэ төслүүд нь өөрийнх нь хамгийн их итгэл хүлээлгэж буй бүтээлүүдийн нэг бөгөөд “бахархаж сурталчилж чадах” кинонууд гэж хэлжээ.

Жүжигчний энэ илэн далангүй байр суурь нь Холливудад ховор тохиолддог зүйл. Учир нь олон жүжигчин карьерынхаа туршид тоглосон бүх бүтээлээ хамгаалахыг хичээдэг бол Холланд зарим кино амжилтгүй болсон гэдгийг хүлээн зөвшөөрч, үзэгчдэд үнэнээр хандахыг сонгосон байна.

Л.Баяр