Энэ сарын 21-28-ны өдрүүдэд 11 11 төвд 1207иргэн хандсаны 79хувь нь санал хүсэлт, 11 хувь нь гомдол, 9 хувь нь шүүмжлэл, бусад нь талархал илгээсэн байна. Нийт хандалтын 329-т холбогдох газрууд хариу өгч, үлдсэн нь шийдвэрлэлтийн шатандаа явж байна.

Эрүүл мэнд, уул уурхай, хөдөлмөр халамж үйлчилгээ, боловсрол, нийслэл хоттой холбоотой асуудал иргэдийн анхаарлын төвд хэвээр байж, хамгийн олон санал шүүмж хүлээн авлаа. Нийслэлтэй холбоотой санал гомдлыг 236 иргэн ирүүлснийг Нийслэлийн Засаг даргын тамгын газарт шилжүүлсэн байна. Түүнчлэн, Ерөнхий сайдад 129, Нийгмийн халамж үйлчилгээний газарт 92, УИХ-ын Тамгын газарт 47, Хууль зүйн яаманд 42, Сангийн яаманд 41, БШУЯ-нд 39, Нийслэлийн боловсролын газарт 32, Цагдаагийн ерөнхий газарт 28, Эрүүл мэндийн яаманд 27, Харилцаа холбооны зохицуулах хороонд 24, ССАЖЯ-нд 22, Уул уурхайн яаманд 18, ХАХНХЯ-нд 16, Гадаад харилцааны яаманд 5санал хүсэлт тус тус иржээ.

Дээрх хугацаанд эрчим хүчний хязгаарлалт, доголдолтой холбоотой гомдол цөөнгүй ирлээ. Нийтийн эзэмшлийн газрууд цас мөсөө цэвэрлэхгүй байгаагаас иргэд халтирч гэмтэж байгааг “11 11 төв”-д иргэд дуулгаж, хотын захын дүүргүүдэд халтиргаа гулгаанаас сэргийлсэн арга хэмжээ хийгдэхгүй байгааг шүүмжилжээ. Мөн хотын захын дүүргүүдэд гэрэлтүүлэг муу байгааг дахин сануулж, зарим газарт гэрлийн шонгууд өдрийн цагаар асаалттай байгааг мэдээлжээ. Шинэчлэлийн Засгийн газраас авсан зохицуулалтын үр дүнд тонн тутам нь 80 мянган төгрөг болон буурч, жижиглэнгийн худалдаанд 40 кг-ийн шуудайтай нь 3200 төгрөгөөр зарагдаж байгаа нүүрс цаг тухайдаа ирэхгүй, эсвэл борлуулалтын цэг эрт хааж байна, хог ихтэй шуудайлсан байна зэрэг гомдлыг “11 11 төв”-д мэдээлсэн байна.

Хөдөө орон нутагт шатахуун түгээх станцууд автобензиний үнийг литр тутамд 50-100 төгрөгөөр нэмсэн талаарх гомдол анхаарал татсан шүүмжийн тоонд орж байна. УИХ болон МАХН-ын дарга Н.Энхбаяртай холбоотой асуудлаар цөөнгүй иргэн санал хүсэлтээ илгээж, хэвлэл мэдээллийн хэрэгслүүд үнэн эсэх нь тодорхойгүй мэдээллүүд гаргаж байгаад хариуцлага тооцох систем алга, энэ салбарт шинэчлэл, хариуцлага хэрэгтэй байна гэжээ. Телевизүүд мэдээллийн хөтөлбөрөөрөө хэрүүл маргаан, доромжлол гүтгэлэг ихтэй мэдээлэл цацаж байгаа нь нийгэмд бухимдал үүсгэхээс гадна залуу үеийнхэнд буруу үлгэрлэл үзүүлж байна хэмээн иргэд шүүмжилсэн байна гэж Засгийн газрын Хэвлэл мэдээлэл, олон нийттэй харилцах албанаас мэдээллээ.