Тив дамнан АНУ-ын хууль бус наймаачны гарт очсон Тиранозаурус Батаарын араг яс Монголд эргэж ирэхээр болоод байгаа. 70 сая жилийн настай, бүтэн шахуу энэ араг яс болон бусад зургаан үлэг гүрвэлийн ясыг хууль бусаар авсан гэдгээ хүлээн зөвшөөрсөн Эрик Брокопид АНУ-ын шүүхээс 17 жилийн ял оноосон. Монголын хэд хэдэн үлэг гүрвэлийн яснаас гадна тэрбээр Хятадын нисдэг үлэг гүрвэл Saurolophus,  Цэрдийн галавын үеийн өвсөн тэжээлтэн болон хэрээтэй төстэй хоёр Oviraptor үлэг гүрвэлийн арга ясыг гэртээ хадгалж байсан нь тогтоогджээ. Монголчууд Батаар олуулаа болж гэртээ эргэж ирнэ гэж баярлаж байгаа ч үүний цаана Монголын говь нутгаас гаралтай гэдэг нь батлагдсан Батаарыг хэрхэн хил давсан бэ гэдэг асуудал анхаарал татна. Манай Байгалийн түүхийн музейд багтахгүй тийм аварга амьтныг хүний нүдэнд өртүүлэлгүйгээр авч гарна гэдэг цаанаа нарийн учиртай нь мэдээж. Батаарыг 2004-2006 оны хооронд хил давуулсан байх магадлалтай гэж эрдэмтэд үзэж байсан юм. Тэгвэл өнгөрсөн наймдугаар сарын 25-наас хойш шоронд хоригдож, байцаагдаж байсан хэрэгтэн Эрик Брокопигоос шүүхийнхэн яаж энэ том арга яснуудыг хил давуулан гаргаж чадсныг тодруулжээ.

  Тэрбээр 2010-2012 оны хооронд эдгээр яснуудыг Монголын хил давуулсан гэдгээ өчжээ. Хууль бус наймаанд гаршсан тэрбээр янз бүрийн аргаар гар дамнуулан авсан араг ясаа энгийн бараа шиг болгож "хувиргах"-д багагүй цаг зарцуулдаг байжээ. Дараа нь хилийн шалган нэвтрүүлэх дээр очиж, байцаагчтай нүүр тулахдаа боодолтой арга ясаа цүнхтэй хувцас шиг л хайш яаж ханддаг байсан аж. "Зүгээр л гэртээ юм аваачиж буй хүн шиг хайнга боож багласан бол байцаагч нар төдийлөн тоохгүй гаргачихдаг. Тиймээс Англи руу гэртээ юм аваачиж байгаа юм шиг л зөөчихдөг байсан" гэж мэдэгдсэн тухай cbsnews.com сайтад мэдээлжээ. Тэрбээр үүнээс өөр ямар нэг нууц арга, техник байхгүй хэмээн өчсөн байх юм. "Монголын ч тэр, Хятадын ч тэр хилээр бараа гаргахад Европ хүн тул нухацтай шалгадаггүй юм" гэж нэмж хэлжээ.

   70 сая жилийн настай Батаарыг Монголын гаалийнхан ингээд гэрийн өмд, хувцас шиг хайхрамжгүй гаргаад явуулжээ. Монголын гаалийнхан энэ хэрэгт холбоотой гэж таамаглаж байсанд гэмт хэрэгтэн иймэхүү хариулт өгчээ. Харин Монголын цагдаа нар ямар "нээлт" хийхийг хүлээх үлдлээ. Монголчууд өөрсдөө ч мэдээгүй байхад түүхийн  олдворыг нь нэг сая доллар хүргэж чадсан хэрэгтний мөрийг Монголын цагдаа нар хэрхэн мөшгих нь сонирхолтой. Мөн яаж, хэний гар дамжин Эрик Брокопигийн гарт очсон бэ гэдэг хариултыг иргэд хүлээж байна.