МАХН-ын дарга Н.Энхбаяр өдгөө Зайсангийн дамжин өнгөрүүлэх хорих 401 дүгээр ангийн нэгдсэн эмнэлэгт хэвтэж буй. Хэдийгээр хорихын эмнэлэгт байгаа боловч тэрээр тус эмнэлгийн эмч нараар эмчилгээ хийлгэхээс татгалзсан. Тиймээс ч биеийн байдал нь эрс муудан, ЭМЯ-наас эмч нарын баг томилогдон дүгнэлт гаргасан юм.
    МАХН-ын дарга Н.Энхбаяр өдгөө Зайсангийн дамжин өнгөрүүлэх хорих 401 дүгээр ангийн нэгдсэн эмнэлэгт хэвтэж буй. Хэдийгээр хорихын эмнэлэгт байгаа боловч тэрээр тус эмнэлгийн эмч нараар эмчилгээ хийлгэхээс татгалзсан. Тиймээс ч биеийн байдал нь эрс муудан, ЭМЯ-наас эмч нарын баг томилогдон дүгнэлт гаргасан юм. Уг дүгнэлтээр түүнийг яаралтай Клиникийн хоёрдугаар эмнэлэгт шилжүүлэн эмчлүүлэх шаардлагатай гэсэн билээ. Тиймээс хорихын эмч нарын зүгээс Н.Энхбаярыг Клиникийн хоёрдугаар эмнэлэгт шилжүүлэх хүсэлтийг Нийслэлийн прокурорын газарт хүргүүлсэн.

    Гэвч 2002 онд батлагдсан Хууль зүй дотоод хэргийн сайд, Эрүүл мэндийн сайдын 313/316 тушаалаар баталсан журам байдаг аж. Уг журамд “Хүнд гэмт хэрэгт шийтгүүлсэн ялтныг клиникийн эмнэлэг төрөлжсөн үйлчилгээний төв, орон нутгийн нэгдсэн эмнэлэгт шилжүүлж эмчлүүлэхийг хориглоно” хэмээн заажээ. Тиймээс энэ заалтын дагуу хорих анги Н.Энхбаярыг шилжүүлэх боломжгүй юм байна.

    Нэгэнт Н.Энхбаярыг шилжүүлэх боломжгүй тул Клиникийн хоёрдугаар эмнэлгийн эмч нарыг хорихын эмнэлэгт очиж, Н.Энхбаярт эмчилгээ үзүүлэхийг шаарджээ. Харин үүний хариуд хоёрдугаар эмнэлгийн эмч нар Н.Энхбаярт эмчилгээ хийхгүй хэмээн мэдэгдсэн байна. Учир нь тэд “Бид өдөр болгон олон цагаар хорих яваад байвал хоёрдугаар эмнэлэгт байгаа үндсэн өвчтөнүүдээ эмчилж чадахгүй болно. Тэгэхээр хоёрдугаар эмнэлэгт хэвтэж байгаа иргэдийн ар гэр гомдоллоно. Тэгэхээр бид очих боломжгүй. Харин манай эмнэлэгт шилжүүлэн авчирвал эмчилгээг нь үргэлжлүүлнэ” гэжээ.

    Гэвч прокурорын газраас журмандаа заасан дагуу Н.Энхбаярыг шилжүүлэхгүй гэсэн билээ. Энэ талаар Нийслэлийн прокурорын газрын Ял эдлүүлэх ажиллагаанд хяналт тавих хэлтсийн дарга Ц.Мөнхбат “Н.Энхбаяр гэдэг хүнийг буцааж улсын хоёрдугаар эмнэлэгт авчир гэж шаардаж байна. Тэд хорихын нэгдсэн эмнэлэгт очиж эмчилгээ хийхгүй гэж байгаа нь сайдынхаа  2002 онд баталсан журмаа зөрчиж байна. Тиймээс хуульд заасан үүргээ биелүүлээгүй эмч нарын асуудлыг холбогдох газар нь шалгаж тодруулах ёстой гэж үзэж байна. Тухайлбал: Эрүүл мэндийн яам” гэсэн юм.

    Мөн “Н.Энхбаяр клиникийн хоёрдугаар эмнэлэгт есөн төрлийн эмчилгээ хийлгэсэн. Тэр эмчилгээг хорих  401 дүгээр ангийн нэгдсэн эмнэлэгт үргэлжлүүлэх бүрэн боломжтой. Харамсалтай нь, Н.Энхбаяр хорих ангийн эм тариаг хэрэглэхээс татгалзсан тухай бичиг хийж өгсөн байна” гэсэн билээ.
Юутай ч Н.Энхбаярыг хоёрдугаар эмнэлэг рүү шилжүүлэхгүй гэсэн журам байна. Мөн эмчилгээг нь хорихын эмнэлэгт үргэлжлүүлэн хийх боломжтой аж. Гэвч тэрээр өөрийг нь хордуулна хэмээн хорихын эмнэлгээр эмчилгээ хийлгэхээс татгалзаад байгаа билээ.