Нийслэлийн засаг дарга Э.Бат-Үүл буруу талдаа рультэй машиныг ням гарагт явуулахгүй байх санал гаргасан нь цөөнгүй иргэдийг бухимдуулж байна. Нийслэлийн иргэдийн 50, түүнээс илүү хувь нь буруу талдаа рультэй, Японоос орж ирсэн машин унадаг тул энэ нь иргэдийн талынх нь эрх ашгийг зөрчиж байгаа хэрэг юм. Өмнө нь дугаарын хязгаарлалт хийхэд иргэд нааштайгаар хүлээж авсан. Учир нь бүх хүн эрх тэгшээр нэг өдөр замын хөдөлгөөнд оролцохгүй. Гэтэл буруу талдаа рультэй гэдгээр нь нэг хэсгийг нь ялгаж байгааг иргэд дэмжихгүй байна.

 Тэгээд ч үүний цаана маш том бизнесийн лобби явагдаж байгаа гэж эх сурвалжууд мэдээлэх боллоо. АНУ, Солонгос, Европын орнуудаас орж ирдэг зөв талдаа жолоотой өндөр үнэтэй машиныг ихэнхидээ баячууд унадаг. Харин энгийн иргэд үнэ ханш, хэрэглээндээ тохируулаад л япон тэрэг унаж байна. Тиймээс баячуудын үнэтэй унааны тоог нэмж, бизнесээ өрөгжүүлэх гэсэн нэгэн лобби хийж эхэлсэн тухай жиг жуг ярилцах болжээ. Тэр улс төрч эрхэм хэн болох нь одоогоор ил болоогүй байгаа ч зөв талдаа хүрдтэй машин оруулж ирдэг хэд хэдэн бизнесмэн энэ журмыг батлуулах гэж Нийслэлийн захиргаа хавиар эргэлдэж байгаа сурагтай.

   Хэрэв энэ шийдвэр батлагдчихвал ард иргэдээс гадна Засгийн газар ч бас багагүй хохирол амсана. Учир нь Засгийн газрын автобаазын өнөөх дрифт хийж тоглоод байдаг гялгар хар машинууд нь мөн л Японоос оруулж ирсэн хүлгүүд. Тиймээс Э.Бат-Үүл даргын санал хэрэгжиж эхэлбэл Засгийн газрын автобаазыг тэр чигээр нь шинэчлэх  давхар лобби явах магадлалтай. Мэдээж АНУ, Солонгос, Европын орнуудаас орж ирсэн тэргүүд өндөр үнэтэй, ихэнхи нь тансаг зэрэглэлийнх. Ард түмний мөнгийг хэмнэе гээд байдаг улс төрчидөд татварын мөнгөөр илүү өндөр үнэтэй машин авч өгөх шаардлагатай болох аж. Дарга нар АНУ-д үйлдвэрлэсэн Lexus, Land cruiser зэрэг саятнуудын машинаа унах зуур үнийг нь дийлэхгүй иргэд явган таваргаж, нийтийн унаандаа чихэлдэж явах нь.