Өнөөдрийн УИХ-ын чуулган 51 хувийн ирцтэйгээр эхэллээ. Чуулганаар нийт найман асуудал хэлэлцэх бөгөөд мөн найман хуулийн эцсийн найруулгыг сонсох юм. Хамгийн эхний асуудал хэлэлцэх үеэр МАН-ын дарга Ө.Энхтүвшин зарим аймгийн засаг дарга нарыг томилох асуудал хүндрээд байгаа хэллээ. Тэрбээр "МАН-ын ялсан зарим аймагт Засагт даргын үүрэг гүйцэтгэгч томилж байна. Ямар ч хуулинд ийм заалт байхгүй. Хөвсгөл аймгийн захиргаа руу цагдаа оруулсан байна. Хууль завхруулсан бол бид засах ёстой. Үүнд анхаарал хандуулж хэлэлцэх асуудлын жагсаалтын тоонд оруулах хэрэгтэй байна. Ерөнхий сайд цэцийн шийдвэр, хууль ямар хамаатай вэ гэсэн байдлаар хандаж байна. Бүлэг дээр дуудсан ирэхгүй байна. Дахин дахин дуудсан ч ирэхгүй байна" гэв.

   Харин УИХ-ын дарга З.Энхболд "Ерөнхий сайдыг шууд ингэж дуудах боломжгүй. Энэ асуудал баасан гарагт Ерөнхий сайд мэдээлэл хийх үеэр яригдсан. Тэгэхэд та бүхэн бодлоготойгоор суугаагүй. Маргаашийн тав дахь өдрийн цаг дээр оруулж болох ч ерөнхий сайд хаалттай мэдээлэл хийнэ. Харин Төрийн байгуулалтын байнгын хороон дээр ярьж байж чуулганд оруулж болно" гэлээ. Одоо УИХ-ын гишүүд зарим хуулийн эцсийн найруулгыг сонсож байна.