Үзэгчдийн дунд хүлээлт үүсгээд буй "Ану хатан" түүхэн уран сайхны кино өнөөдөр 13:00 цагт "Өргөө" кино театрт 17:00 цагт "Тэнгис"-т нээлтээ хийхээр болжээ.

  "Шүүдэр” продакшны бүтээл “Ану хатан” түүхэн уран сайхны киноны зохиолыг зохиолч Б.Шүүдэрцэцэг “Домогт Ану хатан” романаас сэдэвлэн бичиж, найруулагчаар нь СТА Т.Алтантуяа, продюссерээр Д.Болдхуяг нар ажилласан. "Ану хатан" киноны трэйлерийг youtube-д тавьснаас хойшхи гуравхан хоногийн дотор 5000 гаруй хүн үзсэн байдаг. Тус киноны зохиолч Б.Шүүдэрцэцэг киноны уран бүтээлийн талаараа facebook хуудаснаа "Уран бүтээлчид бид үнэхээр урам зориг дүүрэн байна. Бэрхшээл зовлон тоочоод байсан бол энэ бүтээл хэзээ ч төрөхгүй байсан. "Ану хатан" кино хийх санаа мөрөөдөл миний сонссоноор лав л дөрөв таван найруулагчид байсан юм билээ. Улсын төсвийн дэмжлэг, том ивээн тэтгэгчгүйгээр энэ төслийг хэрэгжүүлэхэд ямар их бэрхшээл давснаа, одоо ч хөрөнгө оруулалт хэрэгтэй байгааг энд тоочоод яахав дээ. Өөдрөгөөр харахад бид бага хөрөнгө, давчуу цаг хугацаанд хийе бүтээе гэсэн халуун хүслээр том уран бүтээлийн ард гарч чадаж байгаа минь л хамгийн чухал. Бүх дэмжигчид, ивээн тэтгэгчиддээ баярлалаа" гэж бичжээ.

   Харин "Өргөө-1" кино театрт баасан гаригийн 16 цагаас хойш, "Өргөө 2"-т 18-ны бүх цагаас, "Тэнгис"-т 18-ны 20 цагаас эхлэн өдөр бүр "Ану хатан" гарч эхлэх юм байна. Үргэлжлэх хугацаа 2 цаг 45 минут учраас өдөрт 3-4 удаагийн гаралттай аж.