МАХН-ын дарга Н.Энхбаярыг ялтан хуваариладаг журмын дагуу ШШГЕГ-ын харьяа хорих 441 дүгээр ангид хуваарилаад буй. Тэрээр хуваарилагдахынхаа өмнө Зайсангийн дамжин өнгөрүүлэх хорих 401 дүгээр ангийн нэгдсэн эмнэлэгт хэвтэн эмчлүүлж байсан билээ. Н.Энхбаярыг тус эмнэлэгт байхад Хууль зүйн сайд Х.Тэмүүжин очиж уулзжээ. Тодруулбал, энэ сарын 8-нд очиж уулзсан байна. Гэвч уулзалтаар чухам юуны талаар ярилцсан нь одоогоор тодорхойгүй байна. Эх сурвалжийн мэдээлснээр, 2002 онд батлагдсан Хууль зүй дотоод хэргийн сайд, Эрүүл мэндийн сайдын 313/316 тушаалаар баталсан журмын талаар ярилцсан гэв. Учир нь уг журамд “Хүнд гэмт хэрэгт шийтгүүлсэн ялтныг клиникийн эмнэлэг төрөлжсөн үйлчилгээний төв, орон нутгийн нэгдсэн эмнэлэгт шилжүүлж эмчлүүлэхийг хориглоно” хэмээн заасан байдаг. Тиймээс ЭМЯ-наас томилогдсон эмч нарын бүрэлдэхүүн МАХН-ын дарга Н.Энхбаярыг яаралтай Клиникийн хоёрдугаар эмнэлэгт шилжүүлэх шаардлагатай гэсэн боловч журмын дагуу шилжүүлээгүй юм.
Харин Эрүүл мэндийн сайд Н.Удвал журмыг хүний амьд байх эрхийг ноцтойгоор зөрчиж байна хэмээн үзэж, хүчингүй болгосон юм. Уг хүчингүй болгосон хүсэлтээ Хууль зүйн сайд Х.Тэмүүжинд хүргүүлсэн бөгөөд Х.Тэмүүжин сайд хүсэлтийг саяхан бүртгэж авсан байна. Ингэснээр Н.Энхбаяр болон хүнд ялтнуудын эмнэлэгт эмчлүүлэх эрх нээгдэж байгаа юм байна.
Хууль зүйн сайд Х.Тэмүүжин Н.Энхбаяртай уулзахдаа “Уг журмыг Н.Удвал сайд хүчингүй болгосон. Тэр хүсэлтээ ч надад явуулсан. Гэхдээ би бүртгэж аваагүй байгаа. Яагаад гэхээр зөвхөн танд зориулж, уг журмыг өөрчилж шинэчилж болохгүй. Сайн харж , судалж байж шинэчлэх, өөрчлөх эсэхээ шийднэ. Сайн судлах шаардлагатай байна” гэж хэлсэн бол саяхан уг журмыг бүртгэж авсан билээ.
Юутай ч журмыг сайн судалж байж, шийднэ хэмээн бүртгэж аваагүй байсан Х.Тэмүүжин Н.Энхбаяртай уулзсаныхаа дараа бүртгэж авсан нь Н.Энхбаярын биеийн байдлыг харгалзан үзэж, хүнд ялтнуудын эрхийг зөрчигдөж байна хэмээн үзсэнтэй холбоотой хэмээн иргэд харж байгаа юм.
Б.Золбоо
Сэтгэгдэл (24)